Një dekadë pritje për një sallë koncertesh/ Premtim i ri për “Universalen”, viti 2026

Kaluan gati 10 vite dhe renovimin i sallës Universale në Shkup ende është temë diskutimi.

Për herë të fundit u përdor kur Zoran Zaevi publikonte “bombat” e famshme. Atëherë u pat shkëputur një pjesë e tavanit, që bëri që salla të nxirret jashtë funksionit. Zaevi u bë kryeministër, iku, u ndryshuan 3 kryeministra, e Salla Universale ende nuk u bë.

U ndërruan edhe kryetarë të qytetit të Shkupit, por askush nuk e përfundoi këtë projekt. Në fillim ish-kryetari Koce Trajanovski kishte projekt për sallë të re nga themeli, por kjo nuk u bë. Pasi erdhi në pushtet Petre Shilegov, kërkoi ta ruajë autenticitetin dhe sallën vetëm ta rikonstruktojë, por as kjo nuk u bë. Pas tij, erdhi kryetarja Danella Arsovkës, kur Qyteti ishte në gjendje edhe më të vështirë financiare, pas çka kompetencat e rikonstruimit iu kaluan Ministrisë së Kulturës.

Tash kemi premtim të ri! Punët tashmë kanë nisur për rikonstruim, ndërsa ministrja e kulturës Bisera Kostadinova premton do të përfundojë në vitin 2026.

“Të shpallim fillimin e rindërtimit të Sallës Universale – simbol arkitektonik dhe kulturor i Shkupit. Ministria e Kulturës ka marrë përsipër që projektin ta realizojë pa probleme në tre vitet e ardhshme, sepse kemi siguruar mjete financiare dhe dokumentacion të plotë.”- deklaroi Bisera Kostadinova Ministre e Kulturës.

Projektuesi Bujar Muça bëri të ditur se salla do të modernizohet, por do të ketë 300 karrige më pak, me qëllim që ulëset e reja të jenë më komode.

“Pas dy vitesh do të vazhdojë të realizohet diçka për të cilën kemi investuar realisht. Kemi investuar edhe intelektualisht edhe materialisht. Objekti është gati, projekti është gati, gati në të gjitha fazat para 2-3 viteve nga viti 2021. Tani është në dispozicion të kontraktorëve.”- tha Bujar Muça Projektues.

Menaxherja e kompanisë kontraktore “Universal-Balkan”, Biljana Blazevska, tha se rikonstruksioni dhe përshtatja e sallës Universale do të bëhet për 90 ditë nga dita e dorëzimit të porosisë për kryerjen e punëve.

“Nuk kemi probleme dhe do e mbarojmë këtë fazë në afatin e përcaktuar, domethënë 90 ditë të kalendarit nga dita e dorëzimit të porosisë për kryerjen e punëve.”- tha Biljana Blazhevska.

Lubin Makrovski, inxhinier mbikëqyrës ,tha se gjatë ndërtimit janë shfaqur disa probleme, të zakonshme që ndodhin në të gjitha kantieret, ku ka keqkuptime teknike, procedurale dhe burokratike.

“Jam dakord me deklaratën e kryetarit për paqëndrueshmërinë e godinës, por është nxjerrë jashtë kontestit. I referohet zbatimit teknik dhe mundësisë së kolapsit.”- pohoi Lubin Makrovski Inxhinier Mbikqyrës.

Ish-kryeministri Dimitar Kovaçevski, që sot këtu mori pjesë si kryetar i LSDM-së, theksoi se pas rikonstruimit salla do t’i rikthehet për shfrytëzim Qytetit të Shkupit.