Nivel i lartë i dhunës te nxënësit, në shkolla mbajnë thika, gjatë mësimit online kanë sulme kibernetike

Nga mbajtja e thikës dhe armëve e deri te nënçmimi e ofendimi. Këto janë format e dhunës me të cilat përballen nxënësit në shkollat e Maqedonisë së Veriut.

Prezenca e dhunës është e pranishme kudo, pavarësisht asaj se shkollat a janë rurale apo urbane, njëetnike apo multietnike. Kjo sipas Ambasadës së parë të fëmijëve “Megjashi” ndodh për shkak se shkollat për nxënësit po bëhen gjithnjë dhe më të rrezikshme.

“Ajo që mua më së shumti më shqetëson dhe ku duhet të ndizet alarmi, është mbajtja e thikave në shkollë, ku nxënësit kanë treguar përqindje të lartë prej 41 për qind. Kanë mbajtur edhe shkrepëse e cila është gjetur te 21 për qind e nxënësve dhe mbajtja e armëve me 9 për qind. Kjo është shqetësuese dhe duhet të ndërmerret diçka që shkollat të jenë më të sigurta”, theksoi Dragi Zmijanac, kryetar i “Megjashit”.

Dhuna ka sjellë deri në situata ku nxënësit nuk duan të shkojnë as në shkollë.

“Ka ndodhur të më takojë prindër dhe të më kërkojë: Ju lutem të mbani një punëtori për dhunën te bija ime, sepse ajo çdo ditë përballet me nënçmime, ofendime dhe injorim, dhe tashmë nuk dëshiron të shkojë as në shkollë”, tha Valentina Shterjovska.

Por dhuna nuk është ndalë as gjatë mësimi online. Nga dhunë fizike ka kaluar në sulm kibernetik.

“Është e rëndësishme që edhe në këto kushte të vendosim rrjet komunikimi me nxënësit tanë dhe t’i mbështesim ata. Tani, nxënësit që kanë qenë të izoluar, tash janë edhe më të izoluar sepse nuk e ka atë kontaktin fizik në shkolla. Dhuna kibernetike është më e pranishme se sa në kushte normale”, u shpreh Ana Poprizova, psikologe.

Hulumtimi i “Megjashit” është realizuar gjatë nëntorit të 2019-s dhe përfshiu 400 të anketuar, por për shkak të pandemisë u publikua tash. Janë paraqitur 22 lloje të dhunës, ku më të shprehurat, për 88 për qind janë ofendimi dhe nënçmimi. Sipas hulumtuesve, situata mund të përmirësohet nëse shkollat bëhen vende më të sigurta dhe nëse nxënësit edukojnë se duhet ta pranojnë dhe respektojnë shokun e klasës.