Nikollovski para Këshillit Europian: Radev e Jotova zbatojnë politika ekstreme djathtiste

Nënkryetari i VMRO-DPMNE-së Aleksandar Nikollovski, para Këshillit të Europës dërgoi kritika deri te politikbërja bullgare, duke përmendur veçanërisht presidentin bullgar Rumen Radev si dhe zëvendës presidenten Ilijana Jotova. Nikollovski akuzon se të njejtit zbatojnë politika skajshmërisht djathtiste dhe ekstremiste. Sipas tij, maqedonasit në Bullgari janë të privuar nga përdorimi i gjuhës dhe e drejta e arsimimit.

“Ideologjinë djathtiste mund ta gjejmë në shumë vende anëtare të Këshillit të Europës. Dua të nënvizoj shembullin e Bullgarisë ku presidenti i shtetit Rumen Radev dhe nënpresidentja Jotova implementojnë politikë djathtiste ekstremiste. Radev e Jotova shfrytëzojnë anëtarësimin e Bullgarisë në BE, duke kërkuar nga maqedonasit të ndryshojnë historinë, gjuhën e kulturën, me qëllim që të fillojnë negociatat për anëtarësim. Njëkohësisht, ata nuk u japin asnjë të drejtë njerëzore maqedonasve të cilët jetojnë në Bullgari, duke i privuar nga e drejta e vetvendosjes, përdorimin e gjuhës dhe të drejtën e arsimimit”, tha Aleksandar Nikollovski, nënkryetar i VMRO-DPMNE-së.

Marrdhëniet mes Bullgarisë e Maqedonisë së Veriut i ka komentuar edhe ambasadorja gjermane në Sofje, Irene Maria Plank. Ajo në një deklaratë për BGNES, porositi që Maqedonia duhet t’i kryejë detyrat e shtëpisë dhe t’u përmbahen marrëveshjeve.

“Unë besoj, do të ishte përparësi për Maqedoninë e Veriut të mund të bëhet pjesë e Bashkimit Europian, por ata duhet të bëjnë detyrat e shtëpisë, ata duhet t’u përmbahen marrëveshjeve. Nga ana tjetër, mendoj se Bullgaria shumë mirë po përmbahet dhe jam dëshmitare për përpjekjet e qeverisë aktuale për të mbajtur qasje miqësore për t’iu përmbajtur çështjeve aktuale”, pohoi Irene Maria Plank, ambasadore gjermane në Bullgari.

Sipas ambasadores, Maqedonia e Veriut dhe Bullgaria janë fqinje të mira dhe do të ishte në interes të dy palëve që procesi të lëvizë përpara. E sa i përket procesit, për momentin Bullgaria po pret që Kuvendi i RMV-së të miratojë ndryshimet kushtetuese përmes së cilave, pjesë e Kushtetutës do të ishte edhe populli bullgar. Nga VMRO-DPMNE vazhdimisht përsërisin se nuk do të lejojnë ndryshime kushtetuese nën diktatin bullgar, edhe pse nga pushteti e mohojnë se po ndodh një gjë e tillë. Qeveritarët vazhdimisht kanë përsëritur se me futjen e bullgarëve në kushtetutë, do të konfirmohet identiteti maqedonas si popull.