Nga shenjtorët deri te taksa për beqarët! Debat për ribalancin e buxhetit në Komisionin Kuvendor

Debate të ashpra dhe akuza të rënda mes pushtetit dhe opozitës në ditën e tretë të diskutimit në komision kuvendor për ribalancin e buxhetit. Kush sa miliarda nga paratë e qytetarëve i ka hedhur kot, kush sheh përmes syzeve rozë, deri te ajo se kush i ka shpërngulur të rinjtë. U hodhën akuza edhe për paralajmërimin e kryeministrit se do të vendoset taksë për beqarët. LSDM vlerëson se kjo masë do t’i detyrojë të rinjtë të emigrojnë edhe më shumë.

“Mrekulli ekonomike jemi, apo jo, të katërtit në Evropë, më të mirët, po e shihni. Dje ju tha kolegu Micinoviq – jemi Suedi. Nuk është Suedi, dilni jashtë. Por ja ku e keni lajmin më të ri për të rinjtë, madje edhe për ata në moshë, që nuk janë martuar. Do ju vendosin taksë. Hajde të shohim tani. Rastësisht po doni të ndërtoni karrierë – bum, taksë nga të djathtët. Pse? Që oligarkët dhe të tjerët të kenë më shumë në xhep”, u shpreh Fatmir Bytyqi nga LSDM.

Pushteti me akuza se gjithmonë gjatë qeverisjes së LSDM-së, vendi përjetonte katastrofë demografike.

“Çdo rast do ta shfrytëzojmë për të kujtuar paaftësinë dhe hajdutërinë tuaj. Shtatë vite e keni tharë këtë popull dhe tani duhet t’ju dëgjojmë si të ishit Shën Mëri dhe Shenjtorë. Sikur nuk i keni shkelur milingonat, ndërsa njerëz të gjallë i hëngrët. Të kthehem te ribalanci dhe të kujtoj për projektin ‘Bli shtëpi për të rinjtë’, të cilin ju e fikët sepse nuk ju konvenonte. Ne këtë projekt po e riaktivizojmë dhe sigurojmë rritje të mjeteve prej 111%”, theksoi Dafina Stojanovska nga VMRO-DPMNE.

Sot përfundon debati i përgjithshëm për propozim-ribalancin, pas së cilës do të vazhdohet me shqyrtimin e amendamenteve. Janë dorëzuar gjithsej 226 amendamente, prej të cilëve 160 nga opozita LSDM. Mes tyre përfshihen ndarja e 934 milionë denarëve për ndihmë financiare për familjet e viktimave dhe të plagosurve në Koçan; 60 milionë denarë për rinovimin e spitalit në Koçan dhe 20 milionë për pajisje të reja, rritje të bursave studentore dhe të tjera. Debati në komision zgjat gjithsej dhjetë ditë, pas së cilës ribalanci kalon në seancë plenare.