Nga Italia erdhi në Batincë për Ramazan! Dëshpërohet pasi fshati nuk ka ujë tashmë 8 vjet

Me bidonë mbushin ujë për pije dhe për larjen e enëve. Batinca e Studeniçanit 8 vitet e fundit nuk ka ujë. Banorët të revoltuar rastin e paraqitën në emisionin Thirre21-shin.
Mërgimtari Selam Xheladini, i cili ka ardhur nga Italia për ta kaluar Ramazanin në vendlindje, është dëshpëruar nga gjendja, pasi që siç thotë nuk mund të shkojë as në tualet.

“Dje kam ardhur për Ramazanin që të agjëroj, mirëpo më ftohet edhe jeta kur vi këtu. Edhe shtëpia ime ftohet! Pse sepse do të shkoj në mëngjes do e lëshoj ujin, si tha ky hoxha, tha duhet ta kontrollosh a ke ujë por të shkosh në tualet. Me çfarë? Ky është problemi më i madh. 8 vitet e fundit kështu ne jemi 0 pa ujë, dimër-verë problemin e kemi nonstop”, tha Selam Xheladini

Xheladini tregoi se i gjithë fshati furnizohet me ujë në bunarin që kanë vendosur hidrofor në fshat, mirëpo nuk e përdorin për pije.

Kryetari i Komunës së Studeniçanit Azem Sadiku, tha se janë duke e përgatitur një projekt i cili do të jetë gati brenda një viti.

“Jemi duke e përgatitur një projekt që atë pjesë të fshatit Batincë ta përfshijmë me ujësjellësin që jemi duke e sjellë prej liqenit të Sallakovës për vendbanimet e malësisë, Koliçani i Poshtëm, Koliçani i Epërm, Uji i Kuq e kështu me rradhë dhe si ide e kemi që ta fillojmë një projekt që pjesën e Dreshnciës në Batincë dhe fshatin Draçevicë t’i kyçim në këtë rrjet që ne do ta sjellim si komunë”, deklaroi Azem Sadiku.

Ndryshe, kërkuam përgjigje edhe nga NP “Ujësjellësi dhe Kanalizimi”, por deri në këtë edicion të lajmeve nuk morëm përgjigje. Më shumë detaje nga kjo temë do të mund t’i ndiqni nesër në emisionin “Thirre 21-shin”.