Nga të gjitha anët po tentohet të sulmohet BDI-ja, pohoi mbrëmë nga Çairi nënkryetari i integristëve Bujar Osmani. Sipas tij, qarqe të ndryshme të koordinuara mirë, konsiderojnë se BDI-ja dhe shqiptarët janë e keqja e këtij shteti.
“Po dëgjoni kohëve të fundit është krijuar një konspiracion i madh kundër BDI-së. BDI-ja qenka e keqja e shtetit, BDI-ja qenka e keqja e kësaj shoqërie. E dëgjoni nga burime të shumta që shihet qartë se janë të koordinuara mirë. Dua t’iu bëjë me dije diçka, fjala BDI në këtë rast është vetëm eufemizëm, është vetëm korrektësi politike. Kur ata thonë se BDI është e keqja e këtij shteti, ata mendojnë se shqiptarët janë e keqja e këtij shteti”, pohoi Bujar Osmani, nënkryetar i BDI-së.
Pak më vonë këtij tubimi të BDI-së, kryetari i degës Çair, Bekim Neziri, nga emisioni ClickPlus hodhi dyshime se VMRO dhe Levica kanë gisht tek disa parti shqiptare.
“Parti të ndryshme, ose parti të caktuara politike, VMRO dhe Levica, por unë nuk mendoj që është vetëm VMRO dhe Levica, mendoj se ato kanë gisht edhe në subjektet politike shqiptare”, tha Bekim Neziri, kryetar dege Çair, BDI.
Ndaj këtyre qëndrimeve u kundërpërgjigj deputeti i Lëvizjes Besa, Fadil Zendeli, pjesë e koalicionit Lidhja Europiane për Ndryshim. Sipas Zendelit, koalicioni opozitar ka qëllim vetëm që të bëjë ndryshime në skenën politike, e sipas tij, kjo i tmerron zyrtarët e BDI-së.
“Kur flasim me zyrtarë të BDI-së të cilët janë të gatshëm edhe me dreqin të bashkëpunojnë, të bëjnë koalicion për ndonjë aferë, për ndonjë përfitim qeverisës financiar, nuk ia vlen shumë me diskutu. Ky koalicion ka për bazë dhe objektiv të qartë, ndryshimin e qeverisjes veçanërisht te pjesa shqiptare. Ky koalicion tregon që ka kapacitete të plota politike të gjithanshme që ka kapacitet të bëjë ndryshimin në skenën politike dhe kjo është ajo që i tmerron zyrtarët e BDI-së dhe japin deklarata skandaloze dhe që nuk ecin për toke”, pohoi Fadil Zendeli, deputet i Lëvizjes Besa.
Përndryshe edhe dje nga opozita shqiptare kishte akuza ndaj BDI-së se qëllimi i tyre i vetëm është se si të mbijetojnë në skenën politike, duke kthyer ish-kryeministrin e arratisur Nikolla Gruevski.