Benjamin Netanyahu deklaroi mbrëmë se Irani nuk ka më kapacitet për pasurimin e uraniumit apo për prodhimin e raketave balistike, gjatë një konference për media në ditën e 20-të të luftës izraelito-amerikane kundër Iran.
“Ne po fitojmë, ndërsa Irani është i “dekapituar”,” tha Netanyahu, duke shtuar se arsenali i raketave dhe dronëve të Iranit është reduktuar ndjeshëm dhe do të shkatërrohet plotësisht.
“Tani po shkatërrojmë fabrikat që prodhojnë komponentë për këto raketa dhe për armët bërthamore që ata po përpiqen të prodhojnë,” shtoi lideri izraelit.
Ai nuk paraqiti prova për pretendimin se Irani nuk ka më kapacitet për pasurimin e uraniumit, vërejnë agjencitë ndërkombëtare.
Programi bërthamor i Iranit mbetet një çështje qendrore në bisedimet ndërmjet SHBA-ve dhe Iranit, të cilat zhvillohen përmes ndërmjetësve. Megjithatë, këto bisedime dështuan pasi SHBA-ja dhe Izraeli nisën një sulm të papritur ndaj Iranit më 28 shkurt.
Më pas, Irani lëshoi raketa drejt Izraelit dhe vendeve të Gjirit Persik, si dhe bllokoi Strait of Hormuz, përmes së cilës kalon rreth 20 për qind e naftës dhe gazit natyror të lëngshëm në botë.
“Edhe pse lufta po zgjat gati tre javë, ende nuk është e qartë nëse iranianët do të dalin në rrugë për të rrëzuar qeverinë e tyre,” tha Netanyahu.
Ai shtoi se vetë populli iranian duhet “të zgjedhë momentin e duhur dhe ta shfrytëzojë atë”.
Netanyahu theksoi gjithashtu se duhet të ketë edhe një komponent tokësor në luftë, e cila deri më tani është zhvilluar kryesisht përmes sulmeve ajrore. “Ka shumë mundësi për këtë komponent tokësor,” tha ai, pa dhënë detaje.
Ai mohoi gjithashtu se Izraeli i ka tërhequr Shtetet e Bashkuara në këtë konflikt.