Ali Ahmeti po e lutë Mickoskin për koalicionim pa kushte e për VLEN-in nuk ka dëgjuar se kanë kushte. Kështu u shpreh dje kreu i VMRO-DPMNE-së, Hristijan Mickoski. Për kushtet për ndryshimet kushtetuese, thotë se kjo çështje po imponohet qëllimisht nga BDI për të kërkuar shpëtim.
Duke komentuar deklaratat e Mickoskit, Osmani thotë se ata Qeverinë nuk e shohin si qëllim në vete por si instrument për barazi të plotë të qytetarëve dhe integrim të vendit në Bashkimin Europian. Osmani rikujton ofrimin e dorëheqjes dhe largimit nga Qeveria gati një vit më parë në rast se VMRO pranonte ndryshimet kushtetuese.
“Ne Qeverinë nuk e shohim si qëllim në vete. Ne Qeverinë e shohim si instrument për të arritur qëllimet tona. Qëllimet tona janë shumë të thjeshta. Është barazi e plotë e qytetarëve dhe komuniteteve, anëtarësim në NATO dhe BE. Ne Qeverinë e shohim si mundësi për t’i arritur këto qëllime të qytetarëve, për dallim nga ato të cilët janë të gatshëm që për qeveri janë të gatshëm të rrezikojnë edhe popullin edhe vullnetin e popullit”, tha Osmani.
Nga ana tjetër edhe Izet Mexhiti nga koalicioni VLEN, thotë se ata nuk do të pranojnë të jenë me çdo kusht pjesë e një përbërje qeveritare, e cila nuk do të jetë e orientuar drejt Bashkimin Europian.
“Sa i përket VLEN-it, një prej pikave është orientimi europian i Qeverisë. Ne nuk duam që me çdo kusht të jemi pjesë e çfarëdo lloj qeverie e cila nuk e ka orientimin e qartë drejt integrimeve europiane dhe strukturave euroatlantike”, tha Mexhiti.
Sipas Mexhitit, në formimin e qeverisë nuk mund të shkelet parimi fituesi me fituesin sepse siç thotë, në këto zgjedhje shqiptarët kanë vetëm një opsion. Për Frontin Europian shprehet se nuk është opsion që përfaqëson shqiptarët meqenëse përbëhet nga katër komunitete të ndryshme.
Përndryshe paraprakisht edhe Fronti Europian edhe VLEN, më herët kanë deklaruar se kanë një marrëveshje mes vete se nuk do të hyjnë në koalicion me asnjë parti politike nëse e njëjta nuk garanton ndryshimet kushtetuese në një afat të shkurtër kohor pas formimit të qeverisë.