Në pikun e epidemisë, Kuçkova e Shkupit pa ujë, “Edhe çezma ku mbushim ujë është me esheriakoli”

14 kilometra është larg kryeqytetit, por mbi 100 shtëpi të fshatit Kuçkovë në kulmin e epidemisë furnizohen me ujë nga e vetmja çezmë e fshatit.

Të revoltuar nga kjo situatë, banorët u grumbulluan në mesin e fshatit për të alarmuar për gjendjen ku gjenden për momentin.

Problemi është i vjetër prej dy dekadash, por zgjidhje të përkohshme ka pasur kohë pas kohe. Por, që kur është paraqitur virusi Kovid-19 në muajin shkurt, nuk ka fare ujë.

“Është a pamundur të mbahet higjiena. Këtu pjesa dërmuese janë të moshuar. Të gjithë janë në grupin e rrezikut. Ja karroca për ujë. Tërë ditën dërgojmë, sjellim. Gjithçka që do të kapni, duhet të lahet. Tash lajmë në duar, vijmë këtu te çezma edhe i lajmë rrobat. Ja këto janë hallet tona. Duke mbajtur kova edhe këtu (beli) ka filluar të na dhembë”, tha Jovan Dimishkovski banor i Kuçkovës.

Situata rëndohet më shumë, sepse edhe uji nga çezma ku mbush i gjithë fshati përmban esheria koli, baktere kjo që sulmon organet e tretjes te njeriu.

“Ky ujë këtu është me baktere. Nga ku e keni këtë informacion? Para asaj ka shkruar këtu se ka esheria koli. Dhe një grua këtu që jeton, ka paguar vetë 1500 denarë dhe ka bërë testime dhe është vërtetuar esheria koli”, qan hallin Dimishkovski.

Të pakënaqur nga Bashkësia Lokale e fshatit, banorët janë organizuar vetë. Në komunë kanë dërguar dy procesverbale nga këshilli që e kanë formuar, por nga atje pa përgjigje.

Edhe brenda bashkësisë lokale ka pakënaqësi për mungesën e ujit.

“Jam tërësisht i zhgënjyer. Në shekullin 21 të mos kemi ujë, njerëzit mundohen shumë”, deklaroi Vojo Georgievski, anëtar i Bashkësisë Lokale.

Ndërkaq kryetarit të Bashkësisë Lokale nga Komuna e Gjorçe Petrovit i kanë premtuar se ujësjellësi do të sigurohet kur do të fillojë ndërtimi i Qendrës Klinike. Por banorët thonë se kjo është e pavërtetë.

“Mbledhjen e fundit që e kemi pasur me kryetarin e Komunës së Gjorçe Petrovit, u premtua se një rrjet do të lëshohet edhe për fshatin Kuçkovë…. Nuk është e vërtetë(banorët)”, deklaroi kryetari i Bashkësisë Lokale, Tome Trajkovski.

Ndërkaq nga komuna pa zgjidhje. Thonë se banorët do të jenë në këtë gjendje deri në fund të vitit.

“Shihni, ne kemi bërë një shpuarje më herët, mbi 100 metra por nuk kemi gjetur ujë. Po bëjmë projekt për ujësjellës, por nuk mund të sjellim ujësjellës nga Rashçja në Kuçkovë. Tash po gjejmë mjete të reja me ribalancin, që të vijnë nga kompania dhe të bëjnë edhe një shpuarje që të shohim ku mund të gjejmë ujë. Por kjo nuk mund të bëhet këtë vit assesi”, tha për TV21, kryetari i Gjorçe Petrovski, Aleksandër Naumovski.

Banorët kërkonin që të kenë një rrjet ujësjellësi para se të rregullohet rruga, por kryetari tha se kjo është e pamundur për shkak se mjetet për rrugën janë siguruar nga projekte të Bashkimit Evropian, e Bashkimi Evropian siç tha ai nuk ndan mjete për ujësjellës.

U larguam nga Kuçkova, por të moshuarit vazhdonin të bartnin kova me ujë bakteriologjik edhe atë në pikë të vapës.