“Në ndonjërin front, ose nuk shkojmë fare në zgjedhje”/ASH-krahu i Selës para dy opsioneve, VLEN u bën thirrje që të ndërrojnë mendje

Aleanca për Shqiptarët me në krye Ziadin Selën, ka mbetur partia e vetme e cila deri tani nuk është përcaktuar nëse dhe cilit front do t’i bashkëngjitet, atij Europian apo atij opozitar VLEN. Kreu i kësaj partie Ziadin Sela, thotë se ASH për momentin ka vetëm dy opsione, ose t’i bashkangjitet njërit prej fronteve, ose të mos merr pjesë fare në zgjedhje, për shkak të afateve ligjore por edhe se listat duhet të vulosen nga Taravari.

“E vetmja zgjidhje e Aleancës për Shqiptarët nëse dëshiron të shkojë është t’i ketë vulat e partisë, ndryshe nuk e ka këtë mundësi. Në momentin që flasim, Aleanca për Shqiptarët i ka vetëm dy zgjidhje, t’i bashkangjitet njërit nga blloqet ose të mos mer pjesë aspak në zgjedhje sepse këtë nuk e lejon afatet ligjore të cilat janë paraparë”, tha Ziadin Sela –ASH.

E përderisa nuk ka ardhur vendimi i Kuvendit Qendror, nga VLEN i bëjnë thirrje Selës dhe Llogës që të ndryshojnë mendje dhe t’i bashkangjiten frontit opozitar.

“Na vjen keq sinqerisht që Sela dhe Lloga i vendosën interesat e tyre personale para interesave të shqiptarëve, të cilët janë të vendosur qartë dhe pa mëdyshje ta dërgojnë BDI-në në opozitë. Ata kanë kohë deri të shtunën, nëse rastësisht ndryshojnë mendje, do të marrin vulat e ASH-së për listat e deputetëve për të performuar vetë”, thonë  nga VLEN.

Nuk ka vonuar përgjigja e Krenar Llogës. Ai thotë se koalicioni LEN është mësuar t’i len rrugëve partnerët e koalicionit dhe kërkon nga Taravari t’i kthejë vulat e partisë.

“Koalicioni LEN ka traditë të LEN rrugëve partnerët e koalicioneve që ato ndërtojnë (disa si МОЖЕМЕ, disa duke u vetëkidnapuar, disa të pandashëm me Mickon, e disa që s’shkoqen prëj Qeverisë), ashtu siç edhe ndërrojnë emrat në këto koalicione.  Vulat e ASH-ës nuk janë pronë e individit, aq më pak e atij që braktisi shtëpinë e tij politike, dhe sa për ultimatumet, përdorni ato me VMRO-në, jo me Aleancën për Shqiptarët”, pohoi Krenar Lloga – sekretar gjeneral ASH-Sela.

Përndryshe derisa ASH të vendosë, Fronti Europian deri tani është zgjeruar me gjithsej 6 parti. BDI, PDSH, PDE, L.Populli, PDT dhe Lidhja e Romëve. Ndërsa nga ana tjetër VLEN përbëhet nga 4 parti politike, Alternativa, Lëvizja Besa, Lëvizja Demokratike dhe Aleanca për Shqiptarët me në krye Arben Taravarin, ndërsa e kanë edhe mbështetjen e Vetëvendosjes së Kosovës.