Vetura të parkuara mbi gjelbërim kanë uzurpuar parkun afër Kalasë së Shkupit. Pak metra më larg policia po vëzhgon situatën, për shkak të inaugurimit të resit të ri në xhaminë “Mustafa Pashë” në Shkup.
Në xhami të gjithë mbanin maska, por ishte vështirë të mbahet distanca për shkak numrit të madh të njerëzve. Reisi i ri Shaqir Fetahu e vendosi shiritin e gjelbër, që në gjuhën arabe quhet Menshure. Me këtë akt reisit i jepet legjitimitet për kryerjen e obligimeve në Bashkësinë fetare Islame.
Pas kësaj dha betimin se do të punojë për unitetin e myslimanëve pa dallim të përkatësisë etnike.
“Do të jap kontribut, për ruajtjen e unitetit të myslimanëve. Të vendit, brenda dhe jashtë tij. Si dhe në mbrojtjen e bashkëjetesës”, tha Fetahu.
Përkrahje me fjalime të tyre i dhanë të gjitha myftinjtë nga komunitetet tjera etnike në vend.
Ndërkohë nuk munguan as përfaqësues nga partitë politike e përfaqësues nga Qeveria.
“Ishte kënaqësi që morën pjesë edhe pjesëtarë të islamit të territorit, edhe pse është gjendje e jashtëzakonshme me rastin e sëmundjes Kovid unë shpreh falënderimet e mia të sinqerta të Bashkësisë Fetare Islame në tërë territorin e Ballkanit dhe më gjerë të cilët gjetën kohë dhe mund që sot të vijnë”, deklaroi Fetahu.
Përfaqësues të myftinisë kishte nga Shqipëria, Kosova dhe Kroacia. I uruan punë të mbarë reisit të ri.
“Suksese për të gjithë neve. Zoti na ruajt neve nga ky virus që na ka kapluar të gjithë botën. Zoti e ndaloftë atë dhe të dalim faqebardhë inshallah”, tha Bujar Spahiu përfaqësues nga Shqipëria.
“Myftiniut i uroj shëndet, sukses, dhe uroj që ata që janë afër tij të jenë të sinqertë dhe të bashkëpunojnë”, tha përfaqësues nga Kosova.
“Uroj edhe një herë, dhe me bindëshmëri mund të them që Qeveria e RMV-së me këtë njeri mund të ketë një rrugëtim në të cilën RMV-ja veçmë ka filluar rrugëtimin e ai është Bashkimi Evropjan”, tha përfaqësues nga Kroacia.
Ndryshe Shaqir Fetahu u zgjidh për reis me 18 vota pro dhe 3 kundër. Para kësaj ishte 7 muaj ushtrues detyre i BFI-së. Më herët, ish-kreu BFI-së Sulejman Rexhepi në deklaratë me shkrim tha se jep dorëheqje nga pozita e tij dhe tha se është gati të përgjigjet para Zotit dhe para ligjit, nëse dikush mendon se ka bërë gabime. Sulejman Rexhepi ka qenë udhëheqësi fetar islam në vend për gati 30 vjet.