Në Konjare nuk do të ketë eksploatim të rërës! Bekteshi propozon të anulohet koncesioni

Ministri i Ekonomisë, Kreshnik Bekteshi, ka kërkuar deri në Qeveri që të anulohet eksploatimi i tokës në fshatin Konjare.  Ai thotë se gjatë javës së ardhshme, ditën e martë në seancën qeveritare do të miratohet edhe ai propozim nga ana e Ministrisë së Ekonomisë.

 “Gjatë ditës së djeshme, inspektorati i ambientit jetësor më vetëm se ka dorëzuar raportin ku edhe propozon edhe shfuqizimin e kontratës me koncesionin aktual i cili ndodhet në Konjare.

Ministria e Ekonomisë, unë ministri gjatë ditës e kam nënshkruar edhe propozim vendimin për shfuqizimin e njëanshëm të kontratës nga ana e Qeverisë dhe Ministrisë së Ekonomisë”, tha Kreshnik Bekteshi – Ministër i Ekonomisë.

Në raportin e përgatitur nga Inspektorët e Ambientit Jetësor dhe të Bujqësisë, thuhet se koncensioneri nuk iu është përmbajtur vendimit dhe masave për mbrojtjen e ambientit jetësor të përcaktuara nga rregulloret në fushën e mjedisit.

 “Koncesioneri nuk u është përmbajtur vendimeve dhe masave që kanë të bëjnë me mbrojtjen e mjedisit jetësor të përcaktuara me rregullat nga sfera e mjedisit, respektivisht eksploatimi i lëndëve të para minerale është kryer jashtë bregut në gjerësi prej 50 metrave pas linjës së ujit 50-vjeçar te rrjedhësi i parregulluar i lumit Pçinja”, thonë nga Ministria e Ekonomisë.

Në Konjare të Mesme, gërryerja e tokës ka filluar që nga viti 2008, e që atëherë banorët kanë protestuar që të ndalet nxjerrja e rërës nga lumi dhe dëmtimi i natyrës. Ndërsa kompania që bënë eksploatimin e rërës thotë se i ka të gjitha dokumentacionet dhe nuk ka bërë asnjë shkelje.