Autoritetet iraniane i kanë miratuar tubimet fetare në 180 qytete në të gjithë vendin, duke vlerësuar se rreziku i përhapjes së koronavirusit është zvogëluar pasi numri i përditshëm i rasteve të reja është në rënie të vazhdueshme, transmetojnë mediat britanike.
Tubimet e besimtarëve në xhamitë nëpër Teheran dhe disa qytete të tjera të mëdha janë akoma të ndaluara.
Autoritetet në Teheran e kanë lejuar transportin publik ndërkombëtar dhe punën e qendrave tregtare me qëllim që ta ringjallin ekonominë iraniane sa më shpejt të jetë e mundur, si nga epidemia e koronavirusit ashtu edhe nga sanksionet amerikane, megjithëse ekspertët mjekësorë paralajmërojnë një valë të dytë të mundshme të infeksionit.
Përfaqësuesi i Ministrisë iraniane të Shëndetësisë, Kijanuza Xhanhanpur sot kumtoi se numri i përgjithshëm i rasteve të konfirmuara të Kovid-19 është 104.691 dhe se infeksioni deri më tani ua ka marrë jetën gjithsej 6.541 personave në Iran, që këtë vend bindshëm e vendosi në vendin e parë me raste të vdekjes në Lindjen e Mesme.
“Situata mbetet alarmante në provincën jugperëndimore Kuzstan dhe në kryeqytetin Teheran”, tha Xhahanpur./MIA