Për shkak të mospajtimeve nga disa deputetë, ndryshimet e ligjit për evidencë amë, dështuan të futen sot në Komisionin për Sistem Politik dhe Marrëdhënie mes Bashkësive. Anëtarja e këtij komisioni, deputetja e LSDM, Snezhana Kalevska-Vançeva, thotë se ligji nuk është tërhequr tërësisht, por vetëm sa disa deputetë ta rishikojnë tekstin e propozuar.
“Pika është tërhequr nga rendi i ditës sepse nuk kishte kushte për të vazhduar, një pjesë e deputetëve kanë kërkuar që të bëjnë analizë të tekstit. Ligji nuk është tërhequr. Do të kthehet në rend dite të komisionit amë”, deklaroi Kalevska-Vançeva.
Propozim ligji i ri, që ka kaluar në Qeveri, në Kuvend është sjellë me yllin evropian. Ka kaluar edhe në Komisionin për Çështje Evropiane, po megjithatë, siç mëson TV21, disa deputetë të shumicës kanë pasur dyshimet e tyre, andaj kanë kërkuar kohë ta shqyrtojnë.
Jozyrtarisht mësohet se neni 19-b është ai që shihet më me dyshime, e në cilin thuhet “në procedurën për njohje ligjore të gjinisë nuk do të kërkohet dorëzimi i dëshmive për procedure kirurgjikale për shpërndarje të tërësishëm ose të pjesshëm të gjenitaleve me terapi hormonesh ose çfarëdo qoftë trajtimi tjetër psikiatrik, psikologjik ose mjekësor të parashtruesit të kërkesës”.
Opozitarët janë ata që hapur e kundërshtojnë tekstin aktual. Deputeti I VMRO-DPMNE-së, Bojan Stojanoski, thotë se ndryshimet e propozuara kështu siç janë, nuk mund të kalojnë, sepse janë skandaloze.
“Nëse shohim se ne jemi vend aspirant për në BE, nëse bëjmë analizë se si kjo rregullohet në vende të tjera, në mbi 90% të vendeve, për një gjë të tillë kërkohet observim serioz mjekësor, do të thosha edhe dokumentacion, ndërsa tek ne me këtë zgjidhje ligjore që e propozon pushteti, parashihet se ndonjë individ mund ta ndryshojë gjininë vetëm nëse dorëzon kërkesë në drejtorinë e librave amë dhe kopje të kartës së identitetit”, tha Stojanovski.
Shefi i grupit parlamentar Aleanca-Alternativa uroi që ky propozim ligj të tërhiqet dhe të mos rikthehet asnjëherë. Thotë se Maqedonia e Veriut ka shumë çështje tjera me prioritet për t’i përshtatur me ato të Bashkimit Evropian.
“Kjo është një çështje të cilën as Franca, as plot shtete në BE nuk e kanë implementuar, kështu që uroj të mos kthehet dhe thjesht të mbetet atje ku është. (ngjitje) Ne jemi kundër dhe do të mundohemi me mekanizmat tona demokratike konform fuqive tona politike ta pengojmë sjelljen e një ligji të tillë sepse nuk na dëmton neve as nga aspekti kombëtar, flasim nga aspekti njerëzor”, tha Skender Rexhepi.
BDI nuk arritëm të marrim qëndrim për këtë çështje. Nga ajo që dihet deri më tani, përmes këtij ligji qytetarëve do t’iu jepet e drejta për ta ndryshuar gjininë e lindur si dhe mundësia për ta mohuar përcaktimin gjinor e për t’u regjistruar si “Tjetër”.
Ndryshe propozues dhe përpilues i këtij ligji është Ministria e Drejtësisë.