Nata e kobshme në Koçan, dhimbje dhe pikëllim për jetët e humbura

Shkuan për t’u argëtuar, por pasmesnata e 15 marsit do të ishte e fundit për ta.

Zjarri që shpërtheu në klubin e natës “Puls” në Koçan, i improvizuar në një magazinë të vjetër qilimash, ua mori jetën së paku 59 të rinjve ndërsa mbi 150 u lënduan.

Nga videot që u shpërndanë në rrjetet sociale u pa se zjarri nisi nga fishekzjarrit e skenës, të cilët i vunë flakën tavanit të objektit.

Kur panë se flakët po përpinin gjithçka, nisën të vrapojnë për të dalë.

Aq rrëmujë u shkaktua, sa që, siç rrëfeu 20-vjeçarja Marija Taseva, ajo u rrëzua dhe të tjerët kanë shkelur edhe mbi të, në vrap për të shpëtuar.

“Kishte zjarr të madh, të gjithë filluan të dalin jashtë, ta shpëtojnë jetën. Trupa të djegur. Nuk e di nuk kam koment! Motra ime është e humbur, nuk mund ta gjejmë në asnjë spital. Tani presim nga këtu rezultatet a do e gjejmë apo jo! Nëse jo në Shtip, në Shkup në fund”, shtoi Marija Taseva.

Nga dëshmitarët u mësua se në pak minuta zjarri përfshiu gjithçka.

Familjarët dhe prindërit pas orës 2 të natës e kanë marrë vesh se çfarë ka ndodhur!

Pikëllimi është i papërshkrueshëm.

Dragi Stojanov është një nga ata që humbi djalin, Tomçem 21 vjeçar, në tragjedi.

“Një fëmijë kam pasur, vdiq, çfarë të bëjë, edhe të tyre mos të jenë më, edhe ata të vuajnë siç po vuaj unë. 150 persona në një disko, 500 persona në disko. Sa vjet kishte fëmija juaj? 21 vjet, tani duhej të jetonte…Nga Koçani! Të lajmërohen shefat e policisë, të korruptuar, droga, i drogojnë. Diskoteka, diskoteka e kujt është? E të mëdhenjve. Nuk më duhet jeta mua”, u shpreh Dragi Stojanov, prind i një viktime.

Ivica është prind i një 17 vjeçari, që ka qenë i pranishëm në këtë diskotekë mirëpo ka shpëtuar nga zjarri.

Tha se për djegien e objektit në mëngjes e ka informuar pronari i diskotekës, dhe më pas i ka parë videot në rrjetet sociale.

-Kemi qenë mysafir dhe më kërkoi para për të shkuar në diskotekë, tha Ivica, prind.

Çfarë moshe është djali yt?

-17 vjeç.

D.m.th. bëhet fjalë për të mitur?

-Bëhet fjalë për të rritur për të mitur.

Lajmi i trishtë mori jehonë ndërkombëtare!

Qindra mesazhe ngushëllimi kanë arritur, duke shprehur solidaritet dhe ndarë dhimbjen.

Maqedonia e Veriut shpalli 7 ditë zie.