Murtezani: 220 nxënës nuk kanë mjete digjitale, prindërit e SHF “25 Majit” duan rikthimin në shkolla

Prindërit e shkollës fillore komunale “25 Maji” në Hasanbeg të Shkupit kërkojnë rikthimin e nxënësve në shkolla, por në bazë të protokolleve mbrojtëse kundër Kovid-19.

Sipas asaj që deklaroi drejtori, Fadil Murtezani kjo kërkesë e prindërve bazohet edhe në atë se 220 nga gjithsej 1640 nxënës sa ka kjo shkollë nuk kanë mjete digjitale për të ndjekur mësimin online.

“Shumica e prindërve janë që nxënësit të kthehen në shkollë fizikisht. Të gjithë prindërit janë dakord që sipas protokollit të zbatohet procesi arsimor. Por më shumë janë për fizikisht sepse problemin e kemi me një numër të nxënësve të cilët nuk kanë mjete digjitale në shtëpi, kompjuter apo tabletë që ta përcjellin mësimin në distancë. Diku 220 nxënës nuk kanë mjete. Për ato 220 nxënës do të shohim se çfarë do të ndodh”, deklaroi Fadil Murtezani, drejtor i SHF “25 Maji”.

Autoritet kanë paralajmëruar se do të sigurojnë pajisje për nxënësit, por prioritet janë rastet sociale.

“Do të sigurohet pajisje për ndjekjen e mësimit për ato fëmijë që nuk kanë, prioritet janë fëmijët që vijnë nga familjet sociale”, theksoi ish-ministri i Shoqërisë Informatike dhe Administratës.

Shkolla po përgatitet për mësim të kombinuar. Për prani fizike kanë vendosur dezinfektues, kanë vendosur shenja se duhet të mbahet distanca fizike. Për mësim online thonë se shkolla ka mjete digjitale.

 
“Shkolla është e pajisur me mjete digjitale ku sipas orarit do ta përcjellin edhe prej klasës së katërt deri në klasën e nëntë nxënësit prej shtëpie mësimin online.  Sipas planit nga klasa e katër deri në të nëntën nxënësit do të duhet ta ndjekim mësimin online”, potencoi Fadil Murtezani, drejtor i SHF “25 Maji”.

Kanë ende punë, prandaj kanë mirëpritur prolongimin e vitit shkollor.

“Është një lehtësim, për arsye se shkollat që kanë numër të madh të nxënësve që punojnë me dy ndërrime është pak vështirë të organizohet mësimi ashtu siç parasheh protokolli. Shkolla jonë hynë në kategorinë e mësimit të kombinuar, mirëpo kjo shtyrje na ka ardhur pak si refleks që sa më shumë të përgatitemi ashtu siç duhet”, u shpreh drejtori i SHF “25 Maji”, Fadil Murtezani.

Në klasa nuk mund të qëndrojnë më shumë se 20 nxënës, duhet të ketë derë të veçantë për hyrje dhe dalje nga shkolla. Nëse nxënësit dhe të punësuarit derisa janë në shkollë shfaqin simptome, izolohen në një zyrë të veçantë. Nëse ndonjëri rezulton pozitiv me Kovid-19, drejtori informon Qendrën e Shëndetit Publik, komunën dhe Ministrinë e Arsimit dhe Shkencës. Shkollat pritet të hapen më 1 tetor, por fillimisht duhet të miratohen ndryshime ligjore në Kuvend.