Gjykimi ndaj ish-sekretarit të përgjithshëm të Qeverisë, Muhamed Zekiri, do të nisë nga fillimi, pasi prokurorja në seancën e sotme në Gjykatën Themelore Penale aktakuzën e dorëzuar e transformoi në propozim aktakuzë, në përputhje me ndryshimet në Kodin Penal, përcjell TV21. Gjykimi për Zekirin do të nisë nga e para pasi që sipas ndryshimeve të Kodit Penal, lënda ku ai akuzohet për “keqpërdorim të detyrës zyrtare” është rikualifikuar. Sipas nenit 353, Zekiri ndiqej sipas paragrafit 5 të këtij nenit i cili parashikonte dënim me burg prej minimum 5 vitesh burg, ndërkaq ky paragraf është fshirë dhe tani do të ndiqet sipas nenit 4, i cili parashikon dënim me burg prej 1 deri në 5 vjet.
“Në bazë të asaj që janë bërë ndryshime të dispozitave të tashmë propozim aktakuzës së dorëzuar, në pjesën që mbulon elementet ligjore të veprës penale”, sqaroi prokurorja Katerina Kollareviq.
Në seancën e sotme, ish-sekretari i përgjithshëm i Qeverisë, Muhamed Zeqiri ka deklaruar se nuk ndihet fajtor për veprën që i ngarkohet dhe procedura ka vazhduar me marrjen në pyetje të një dëshmitari me kërkesë të mbrojtjes, bashkëshortes së Zekirit, Bisera Zekiri. Ajo u mor në pyetje për kasafortën e tij, gjërat që mbante aty dhe momentet kur i afrohej kasafortës.
Njëkohësisht Zekirit sot i është hequr masa e paraburgimit dhe është zëvendësuar me masa kujdesi. Me masat, Zekiri do të duhet të paraqitet në gjykatë çdo të mërkurë dhe do t’i merret dokumenti i udhëtimit.
Ndryshem, Zekiri akuzohet për “keqpërdorim të pozitës dhe autoritetit zyrtar” .
Prokuroria e akuzon Zeqirin se gjatë periudhës nga prilli i vitit 2021 deri në janar të vitit 2022 në cilësinë e Sekretarit të Përgjithshëm të Qeverisë, pa kryer prokurim publik, ka lidhur kontrata për shërbime konsulence me një kompani në vlerë totale prej një milionë euro, gjegjësisht janë paguar 147.000 euro më shumë se marrëveshja paraprake prej 795.000 euro.