Mitreski do të kërkojë zgjidhje për anëtarin e KSHZ-së/Zendeli: S’mund të kërkohet kompromis për diçka që është e qartë në ligj

Do të kërkohet census rreth çështjes për zgjedhjen e anëtarit të Komisionit Shtetëror të Zgjedhjeve, paralajmëroi kryeparlamentari, Jovan Mitreski. Ai në një intervistë për “Sitel” tha se çështja për sigurimin e censusit është shumë e rëndësishme, sepse për ta zgjedhur anëtarin e KShZ-së nevojitet shumicë prej dy të tretave.

“Gjatë periudhës që vjen, pra brenda këtyre disa ditëve do të kërkoj të bisedoj me të gjitha grupet parlamentare me qëllim që të gjejmë zgjidhje për këtë çështje. Pse? Sepse zgjedhja e anëtarit të KShZ-së bëhet me shumicë prej 2/3. Mendoj se është mirë ta lëvizim procesin, nga Komisioni për Zgjedhjet dhe Emërimet deri te plenumi të vijnë dy propozime, të bisedojmë për ato dy propozimet dhe t’i qasemi procesit të votimit, gjegjësisht të sigurojmë shumicë prej 2/3”, tha Jovan Mitreski, kryetar i Kuvendit.

Por sipas Fadil Zendelit nga opozita shqiptare, të kërkohet kompromis për diçka që është thënë në mënyrë të qartë në Kodin zgjedhor në lidhje me përzgjedhjen e anëtarit të KSHZ-së, është shkelje e ligjit. Ai e thirri Mitreskin, bashkë me deputetët e LSDM-së prej ku vjen edhe vetë ai, të votojnë për zgjedhjen e anëtarit të opozitës shqiptare në mënyrë që çështja të zgjidhet.

“Kodi zgjedhor është tepër i qartë. Ky vend i takon opozitës ndërsa cilat janë partitë politike në opozitë në Kuvend po ashtu dihet, të gjithë e dimë se Aleanca për Shqiptarët është pjesë e pushtetit. Të bëhet kompromis për diçka që vetë ligji e ka rregulluar në mënyrë të qartë, mendoj se një deklaratë e këtillë është deklaratë e papërgjegjshme. Andaj nuk duhet pasur asnjë kompromis por duhet respektuar ligjin. Nëse respektohet ligji, atëherë ky është obligimi i LSDM-së, partia e kryetarit të Kuvendit, ta mbështesë anëtarin e opozitës në KSHZ”, pohoi Fadil Zendeli, L.Besa.

Nga ana tjetër, nënkryetari i Kuvendit, Goran Misovski ishte kritik ndaj opozitës shqiptare. Tha se ata nuk duan që të zgjidhet anëtar në KSHZ , por vetëm shtojnë tensione për të marrë pika politike. Zendeli për këtë deklaratë tha se është e papërgjegjshme.

“Vetëm do t’i them kolegut tim, Misovskit, ja nesër le ta thërrasë Komisionin për zgjedhje dhe emërime dhe ta propozojmë kandidatin tonë nga opozita, Abdush Demiri, shkojmë në seancë plenare dhe ta votojmë me shumicë prej 2/3 dhe të shohim nëse jemi të interesuar apo jo. Nëse nuk jemi të interesuar, pse vazhdimisht ne jemi ata që kërkojnë. Kërkojmë që të respektohet ligji dhe rregullat demokratike. Andaj nuk mund të kuptoj një deklaratë të tillë se ne nuk interesohemi dhe duam të marrim pikë politike. Jo, aspak nuk është e vërtetë dhe është e papërgjegjshme”, tha Fadil Zendeli, L.Besa.

Përndryshe nga ASH pohojnë se vendi u takon atyre për shkak se në zgjedhjet e fundit parlamentare ishin në opozitë dhe ky vend në KSHZ duhej të ishte i tyre edhe më tutje.