Kreditë e planifikuara nga Britania e Madhe, të cilat mund të arrijnë gjashtë miliardë euro në 10 vitet e ardhshme, nuk do ta rrisin borxhin publik, beson Ministrja e Financave Gordana Dimitrieska Koçoska. Ajo me optimizëm njoftoi se në vitet e ardhshme, qeveria e Maqedonisë, pavarësisht tërheqjes së kësteve për projektet që do të zbatohen realisht, do ta mbajë deficitin buxhetor brenda kornizës së Strategjisë Fiskale 2026-2030. Përndryshe, deficiti buxhetor është diferenca midis të ardhurave dhe shpenzimeve në buxhet, domethënë përfaqëson shumën që qeveria nuk e ka, por është e nevojshme për të financuar nevojat e shtetit.
“Po, borxhi publik mund të rritet, vetëm për shkak të deficitit buxhetor më së shumit. Siç thashë përpiqemi ta ulim, ta konsolidojmë dhe do të shohim, besoj se do të arrijmë të kemi deficite më të ulëta në buxhet”, tha Gordana Dimitrievska Koçoska, Ministre e Financave.
Strategjia Fiskale, e cila miratohet nga Parlamenti dhe që duhet të jetë një lloj Kushtetute e Ministrisë së Financave në lidhje me planifikimin e buxhetit, por që nuk është respektuar nga ministrat për dekada të tëra, thotë se deficiti buxhetor do të reduktohet në vitet në vijim, i cili financohet me huamarrje të reja.
Sipas Dimitrievskës, mënyra se si të mos rritet borxhi publik edhe pse kemi huamarrje të reja është që të shkurtohen dëshirat e Ministrive të cilat çdo gjë duan ta realizojnë si investim kapital.
“Dispozita për investimet publike e cakton rrugën. Kjo do të thotë që çdo institucion i tillë duhet së pari të paraqesë një njoftim në Ministrinë e Financave me një shpjegim se pse i duhet ky investim. Pas kësaj, ne kemi një organ të posaçëm brenda qeverisë që do të shqyrtojë të gjitha ato dëshira ose qëllime për investime, dhe bazuar në këtë, do të përcaktojë dhe do t’i propozojë qeverisë, nuk e di, 10, 15, 20 projekte të tilla. Ne besojmë se këto 10 janë projekte me prioritet, 10 të tjerat nuk janë projekte me prioritet për momentin”, shtoi Gordana Dimitrievska Koçoska, Ministre e Financave.
Kjo do të thotë që nga 650 milionë eurot aktuale për investime kapitale, ato që kanë ngecur ose nuk kanë shanse për zbatim real do të refuzohen, duke lënë hapësirë për huamarrje reale prej 300 deri në 400 milionë eurove nga britanikët, që do të ishte brenda deficitit buxhetor të parashikuar nga Strategjia Fiskale.
“Po, do t’ia dalim”, tha Gordana Dimitrievska Koçoska, Ministre E Financave.
U shpreh optimiste ministrja edhe pse ky plan ka shumë sfida ekonomike por edhe politike për shkak se shumë prej ministrave do të duhet të heqin dorë nga planet e tyre ambicioze të cilat megjithatë tingëllojnë mirë para elektoratit.