Në një takim ishin, por nuk e quajnë me të njëjtin emër. Kryeministri i vendit Zoran Zaev, ai i Shqipërisë Edi Rama si dhe Presidenti i Serbisë Aleksandar Vuçiq përmes lidhje online kanë folur sot për vazhdimin e bashkëpunimit rajonal.
Në kumtesën e dërguar nga Qeveria e Maqedonisë së Veriut, kjo quhet “nismë për bashkëpunim të përforcuar rajonal”. Edhe nga Qeveria shqiptare e quajnë “takim në kuadër të bashkëpunimit rajonal”. Por Presidenca serbe i bie më shkurt. E quan “Shengeni i Vogël”.
Në fund, dolën me deklaratë të përbashkët në të cilën shkruhet se mbeten akoma të përkushtuar në rrugën drejt BE-së dhe bashkëpunimit rajonal. Vendeve të Ballkanit Perëndimor u nevojitet BE-ja, po aq sa ato i nevojiten BE-së.
“Duam sa më herët të shohim se katër liritë e BE-së lëvizja e njerëzve, mallrave, shërbimeve dhe kapitalit – zbatohen në gjithë rajonin. Dhe ne do të bëjmë gjithçka që është në duart tona të lëvizim drejt këtij qëllimi përmes fuqisë së shembullit tonë. Në këtë frymë, ne do ta shfaqim mbështetjen tonë të plotë për tregun e përbashkët rajonal në Samitin e Procesit të Berlinit më 5 korrik”, thuhet në deklaratën e përbashkët.
Më poshtë paralajmërohet se më 29 korrik tre liderët do të takohen në Shkup për ta konfirmuar avancimin dhe për të nënshkruar marrëveshje që dalin nga Samiti i Berlinit. Ato pritet të jenë për bashkëpunim dhe ndihmë në rast të fatkeqësive natyrore, si dhe për lehtësimin e tregtisë, importin dhe eksportin mes vendeve tona. Më tej, në deklaratën e përbashkët, ftojnë dhe inkurajojnë edhe kolegët e tyre në rajon që të nënshkruajnë dhe të zbatojnë marrëveshje të ngjashme.
Po përse në këtë takim nuk ishin liderët e tjerë të rajonit, si ai i Kosovës, Malit të Zi e Bosnje-Hercegovinës? Kryeministri Zaev thotë se nisma është e hapur për të gjitha vendet e Ballkanit Perëndimor, por shtoi se ka vende që janë të përgatitura që disa punë e marrëveshje duan t’i bëjnë tani, e disa vende duan ti bëjnë më vonë.
“Tre vendet, ne jemi të fokusuar në shumë lehtësime të përbashkëta të jetës së qytetarëve dhe ekonomisë dhe besojmë në diçka që mund të jetë vetëm plus nga procesi i Berlinit dhe të jetë në favor të saj. E kush dëshiron të bashkëngjitet do të ketë mundësi të tillë, siç publikuam, takimi i radhës me prani fizike është në Shkup, do të jemi Presidenti i Serbisë, kryeministri i Shqipërisë dhe unë si kryeministër i RMV-së, ndërsa ftesa do të kenë edhe të tjerët. Shpresojmë që për çështjet që diskutojmë do të ketë ndonjë vend plus që do të dëshirojë të kyçet”, u shpreh kryeministri Zaev.
Në deklaratën e përbashkët, tre liderët theksojë se kanë për qëllim zhvillimin e investimeve, projekte afatshkurtra për përmirësimin e mjedisit jetësorë dhe për shfrytëzimin më të madh të burimeve të ripërtëritshme të energjisë. Kjo do të ishte pjesë e zbatimit të Planit Ekonomik dhe planit të investimeve të BE-së dhe Agjendës së gjelbër për Ballkanin Perëndimor, shkruhet në komunikatën, në të cilën kërkohet edhe mbështetja e Bashkimit Evropian dhe ShBA-ve si partnerë strategjikë.