Pas anulimit të fluturimeve, mijëra udhëtarë ngecën në aeroportin Hitrou në Britaninë e Madhe. Pwr shkak versionit të ri të virusit korona në Britaninë e Madhe, vendet evropiane po izolohen nga Mbretëria e Bashkuar. Gjendja në aeroport është kaotike, pasagjerët presin me orë të tëra dhe nuk dinë se çfarë të bëjnë pasi fluturimet anulohen çdo moment.
“Erdha këtu si turist më 14 dhjetor dhe tani desha të largohesha por situata ka ndryshuar, tani situata është e vështirë”, tha një qytetar.
“Mendoj se duhet të hapen fluturimet që të arrijmë në mënyrë të sigurte te familjet tona”, tha një qytetar.
Kryeministri i Britanisë Boris Xhonson për sot thirri mbledhje krize në Qeveri duke paralajmëruar masa për izolim.
Maqedonia është një prej vendeve evropiane e cila ndaloi fluturimet nga Britania e Madhe. Komisioni për sëmundje ngjitëse solli masë të re restriktive për 14 ditë vetëizolim për qytetarët të cilët do të vijnë në vendin tonë me fluturime të drejtpërdrejta nga Britania e Madhe si dhe ndalesë për të gjitha fluturimet nga Britania drejt Maqedonisë. Kryeministri Zaev tha se ky mutacion i virusit ka faktor më të madh të transmisionit për dallim nga virusi korona.
“Atë që e kemi prej Komisionit për sëmundje ngjitëse dhe atë që e kemi diskutuar këtë mëngjes është se virusi i ri nuk është shumë serioz dhe vdekjeprurës. Bëhet fjalë për diçka që ende po analizohet. Është konstatuar se ka faktor më të madh të transmisionit përkatësisht transmetohet më së shumti në krahasim me virusin korona”, deklaroi Zaev.
Mutacioni i virusit korona, siç thonë shërbimet britanike, është për 70% më transmetues se forma për të cilën kemi njohuri deri më tani dhe përhapet kryesisht në Londër dhe Angli juglindore me shpejtësi të madhe. Për këtë rajon autoritetet sollën karantinë me kufizime të lëvizjes së qytetarëve. Restrikcionet janë ashpërsuar në Uels dhe Skoci.