Kryeministri i Greqisë Kirijakos Micotakis tha se nuk është i kënaqur me retorikën e mandatarit Hristijan Mickoski. Qëndrimi i këtillë vjen pasi Mickoski tha se emrin kushtetues të shtetit do ta përdorë në Kuvend në betimin solemn për kryeministër dhe në komunikimin ndërkombëtar por jo edhe në paraqitjet e tij publike në vend.
“Kryeministri i Maqedonisë së Veriut, nëse nga momenti i marrjes së funksionit, këmbëngul për këtë retorikë, do të gjendet në pozitë shumë të pakëndshme kur të takohemi në Samitin e NATO-s”, tha Mkirijakos Micotakis – kryeministër i Greqisë.
Mickoski u përgjigj se është i gatshëm për këtë sfidë.
“Nëse në Europë ekzistojnë, por nuk besoj se ekzistojnë, politikanë europianë të cilët prezantohen si politikanë modernë të shekullit 21, megjithatë në vetë kanë motive talibane duke dashur ta kërcënojnë të drejtën e njeriut që e garantojnë konventat ndërkombëtare, unë jam i gatshëm me këta njerëz të argumentoj dhe të debatoj”, tha Hristijan Mickoski – kryetar i VMRO-DPMNE-së.
Micotakis theksoi se Marrëveshja e Prespës parashikon që emri të jetë për përdorim gjithëpërfshirës, d.m.th. për përdorim të jashtëm dhe të brendshëm, duke e hapur përsëri mundësinë për veto të re nga Greqia në rrugën tonë drejt BE-së.
“Shkupi hyri në NATO pikërisht para Marrëveshjes e cila ka probleme brenda vetes, megjithatë siguroi një emër për përdorim të përgjithshëm dhe nëse kontestohet kjo gjë, atëherë Maqedonia e Veriut duhet të dijë se do të ketë probleme të mëdha, jo vetëm në marrëdhëniet e saj dypalëshe me Greqinë por edhe me NATO dhe BE në momente kur ka aspirime për t’u bërë anëtare e saj”, shtoi kryeministri i Greqisë, Kirijakos Micotakis.
“Derisa ka manipulime dhe standarde të dyfishta dhe derisa nuk u përmbahemi kritereve të Kopenhagës dhe vlerave të përcaktuara nga tre personat shumë të rëndësishëm për BE, Gasper, Shuman dhe Adenauer, neve do të na ndodhin deklarata të këtilla anakronike, metoda talibane dhe kthim në shekullin e mesëm”, deklaroi kryetari i VMRO-DPMNE-së, Hristijan Mickoski.
Mickoski paraprakisht tha se nuk do të bëjë kompromise për përdorimin e termit Maqedoni si emër të atdheut të tij dhe se kjo është e drejta e tij e garantuar me Kushtetutën e shtetit.