Rritja e prodhimit industrial në korrik 2025 prej 4,1 përqind në krahasim me të njëjtin muaj të vitit të kaluar, e ka ushqyer optimizmin e kryeministrit Hristijan Mickoski për një rritje solide të prodhimit të brendshëm bruto edhe në tremujorin e tretë të këtij viti. Këtë optimizëm ai e bazon në faktin se bartësi më i rëndësishëm i rritjes është industria përpunuese, e cila është rritur me shtatë përqind në krahasim me korrikun e vitit të kaluar.
Sektorët (korrik 2025/korrik 2024)
| Treguesi | Ndryshimi |
|---|---|
| Industria e përgjithshme | +4,1% |
| Miniera dhe nxjerrja e gurëve | –10,4% |
| Industria përpunuese | +7,0% |
| Energji elektrike, gaz, avull, klimatizim | –7,5% |
“Më së shumti gëzon rritja në industrinë përpunuese, sepse aty kemi vlerën më të madhe të shtuar. Unë pres që kjo të ndodhë edhe në muajin e dytë dhe të tretë të tremujorit të tretë, gjë që do të thotë një rritje solide e prodhimit të brendshëm bruto në tremujorin e tretë, pas asaj rritjeje të prodhimit të brendshëm bruto që e pres në tremujorin e dytë, i cili pason rritjen në tremujorin e parë prej 3,2 përqind”, deklaroi kryeministri Hristijan Mickoski.
Ndërkohë që rritet industria përpunuese, bien disa kategori të tjera si prodhimi i energjisë dhe produktet jo të qëndrueshme për konsum të gjerë. Në këtë grup hyjnë edhe produktet ushqimore si qumështi, frutat e freskëta, barnat, mjetet e pastrimit dhe higjienës personale.
Grupet kryesore industriale (korrik 2025/korrik 2024)
| Kategoria GIG | Ndryshimi |
|---|---|
| Ndërmjetës (përveç energjisë) | +12,5% |
| Produkte kapitale | +18,6% |
| Produkte të qëndrueshme për konsum të gjerë | +2,9% |
| Energji | –6,5% |
| Produkte jo të qëndrueshme për konsum të gjerë | –8,5% |
Megjithatë, kryeministri Mickoski është optimist se rezultatet e mira të përgjithshme në prodhimin industrial, së shpejti do t’i ndiejnë edhe qytetarët.
“Pra, kemi me të vërtetë një gjallërim të madh në ekonomi. Këto rezultate që sot i shohim si shifra, do të ndihen shumë shpejt edhe në jetën reale. Ajo që është e rëndësishme, nuk kemi më fuqiplotë politikë që sulmojnë bizneset e suksesshme, nuk ka më kriminalitet dhe korrupsion, nuk ka më shantazhe, nuk ka më përqindje”, u shpreh Hristijan Mickoski – kryeministër i Maqedonisë së Veriut.
Ndërkohë që rritja në industrinë përpunuese vjen nga disa degë si pajisjet elektrike, makineritë, automjetet motorike, mobiliet dhe të tjera, pikë e dobët mbetet sektori i energjetikës.