“Mickoski është rritur me gurabija dhe keksa” – Ahmeti paralajmëron Mickoskin: Fjalë pas fjale nisë belaja!

Gurë mbi gurë bëhet kalaja, fjalë pas fjale nisë belaja. Kështu u shpreh kreu i Bashkimit Demokratik për Integrim Ali Ahmeti mbrëmë në tubimin qendror të Frontit Europian. Duke komentuar thirrjet e VMRO-DPMNE-së për të fituar 61 deputetë në zgjedhje, Ahmeti thotë se Mickoski është ende i ri dhe akoma i nxjerrë buza qumësht.

“Hristijan Mickoski është rritur me gurabija. Hristijan Mickoski është rritur me keksa. Unë jam rritur në kullë prej guri Hristijan që tre herë e djegur është prej pushtuesve. Hristijan, populli im thotë gurë mbi gurë bëhet kalaja, fjalë pas fjale nisë belaja, mos nis bela! Mos nis bela dhe mati fjalët se je i ri dhe akoma të qet buza tamël”, tha Ahmeti.

Këto fjalë të Ahmetit shkaktuan eufori te publiku. Filluan të brohorasin UÇK, UÇK. Atyre iu bashkangjit edhe vet Ahmeti.

Nuk mungoi përgjigja e Mickoskit. Thotë se kërcënimet e Ahmetit nuk e trembin por e bëjnë të qeshin. Shprehet se këto kërcënime vijnë nga një person para pensionimit, ndërsa Ahmetit i thotë se keksat dhe qumështi, do i ngecin në fyt!

“I rëndësishëm paska qenë për Aliun ushqimi im në fëmijëri. Hmm,, çudi. Përpiqet kërcënimet të mi dërgon përmes barsoletave. Do t’i përgjigjem! Ushqimin tim Ali, e kanë fituar prindërit e mi me shumë dashuri dhe vuajtje, që të më rritin dhe edukojnë në një person i cili do të respektojë dhe do të luftojë për Maqedoninë e tij. E kuptoj nervozën dhe panikun për shkak se për herë të parë po lexoheni dhe jeni para humbjes. Vjen koha për përgjigje për shumë çështje. Ky nuk është viti 2001 por 2024, 23 vite më vonë, e BDI e shndërroi në organizatë kriminale prej të cilës pësojnë edhe shqiptarët edhe maqedonasit. Shumë shpejtë prej sot, edhe keksi edhe qumështi do të ngecin në fyt”, deklaroi Hristijan Mickoski – kryetar i VMRO-DPMNE-së.

Porositë e Ahmetit bënë të reagojë edhe Stojançe Angellov, kryetar i partisë “Dinjiteti”, pjesë e koalicionit me VMRO-në. Angellov i dërgon porosi Ahmetit që të ketë kujdes me kërcënimet e tij sepse siç thotë, Mickoski nuk është vetëm.