Mexhiti: Ligji për “Branitellat” mbetet i bllokuar! Petrovska: A është Mickoski në të njëjtin qëndrim si Mexhiti?

Zv/kryeministri i parë Izet Mexhiti pret që propozim-ligji për Branitellat të mbetet i bllokuar në Komisionin kuvendor për politikë sociale. Sipas tij, ky propozim ligj i deputetes së LSDM-së Sllavjanka Petrovska përdoret për politikë ditore dhe është përpjekje për destabilizim të shtetit. Ai mendon se LSDM dhe BDI veprojnë në mënyrë të sinkronizuar. Në intervistë për REL, në pyetjen e gazetarit nëse ka biseduar me kryeministrin Hristijan Mickoski se si të dalët nga situata me këtë propozim-ligj, Mexhiti u përgjigj në shumës:

“Ne kemi qëndrim përfundimtar se nuk është i mirë për proceset në shtet dhe nuk është ndër prioritetet që të sillet një ligj i tillë dhe i njëjti tani është i bllokuar në Komisionin që e udhëheq Ilire Dauti dhe ne presim që të mbetet atje”, tha Izet Mexhiti, zv/kryemiistër i parë.

Reagoi deputetja Sllavjanka Petrovska e cila e dorëzoi këtë propozim. Ajo e thirri Mickoskin që të përgjigjet nëse është në të njëjtin mendim si Mexhiti.

“Duke pasur parasysh se kryeministri Mickoski deklaroi se qëndron prapa Branitellave, pres që me kapacitetin politik dhe autoritetin që ka, si dikush që ka fituar 500.000 vota në zgjedhjet e fundit, të mundësojë miratimin e Ligjit. Kjo çështje nuk duhet të jetë objekt i zhvendosjes së përgjegjësisë, por i marrjes së vendimeve politike. Kryeministri Mickoski duhet të përgjigjet nëse ky qëndrim i Mexhitit është edhe qëndrim i koalicionit qeveritar”, shtoi Sllavjanka Petrovska, deputete e LSDM.

Paraprakisht, kryeministri Mickoski theksoi se Branitellat gjithmonë do ta kenë mbështetjen e VMRO-DPMNE-së dhe i bëri thirrje deputetes së Frontit Europian, Ilire Dauti që propozimin ta vendosë në rend dite. Nga ana tjetër, Dauti është e vendosur që ky ligj i propozuar të mos jetë në agjendën e Komisionit. Socialdemokratët theksuan se në vend të Dautit këtë mund ta bëjë kryeparlamentari Afrim Gashi, të cilit i kanë dorëzuar një shkresë, por kabineti i tij është përgjigjur se Gashi nuk mund të thërrasë  seancë të Komisionit që tashmë është mbajtur, edhe pse kjo pikë nuk ishte në rendin e ditës. Përndryshe me propozimin e Petrovskës parashihet rritje e kompensimit financiar për invalidët dhe familjet e pjesëtarëve të ARM-së që humbën jetën në konfliktin e vitit 2001.