Mexhiti kritikon Frontin Europian: Ahmeti e ka dorëzuar luftën në kampin shqiptar

Kreut të Lëvizjes Demokratike Izet Mexhitit, nuk i besohet që dy oponentët e kahmotshëm në skenën politike, Ali Ahmeti dhe Menduh Thaçi, kanë lidhur marrëveshje për pjesmarje të përbashkët në zgjedhjet parlamentare. Sipas Mexhitit, të gjithë ata që e kanë parë fotografinë e lidhjes së bashkëpunimit mes Ahmetit e Thaçit, u është rikthyer kujtimi nga viti 2008, e kur siç thotë ai, shumë familje kanë pësuar dhe madje ka patur viktima nga përplasjet mes votuesve dhe policëve. Atë kohë në pushtet ishte PDSH me në krye Menduh Thaçin.

“Di raste sidomos nga Çegrani ku mbajnë burg dhe janë dënuar për mbushje të kutive për keqpërdorime gjatë procesit zgjedhor. Edhe ne edhe ata kemi qenë aktorë të atij procesi ku kanë dirigjuar në njërën anë Aliu në anën tjetër Menduhi dhe sot pa pikë turpi shtrëngojnë duart për koalicionim dhe atë duke u quajtur si front Europian me krejt këto pasoja që kanë lënë te familjet shqiptare, viktimat shqiptare dhe të gjithë që kanë pësuar në këtë proces”, tha Izet Mexhiti – kryetar i LD.

Përpos me Thaçin, Ahmeti ka lidhur koalicion me PDE-në, me Lëvizjen Populli, por edhe me parti jo shqiptare. Me Lidhjen e Romëve të Kurto Dudush dhe me Partinë Demokratike  Turke të Bejxhan Iljas. Kjo për Mexhitin është shenjë se Ahmeti dhe BDI do t’i humbin zgjedhjet, dhe për këtë shpëtimin e kërkon te partitë e minoriteteve.

“Ali Ahmeti e ka dorëzuar luftën në kampin shqiptar. Ai në debate edhe në TV21, edhe në debate tjera ka thënë se nuk ulet me horra, e tash i mbledhë horrat. E dyta vazhdimisht ka bërë apel që të bashkohet opozita shqiptare, që të formohen dy kampe shqiptare, që të fitojnë shqiptarët, mos digjet vota shqiptare. Dhe në momentin kur u bashkua opozita shqiptare, ai del prej kampit kombëtar dhe del në konceptin qytetar”, u shpreh Izet Mexhiti – kryetar i LD-së.
Çka nënkuptoni me atë se kalon në konceptin qytetar?
“Është legjitime, por ai po mundohet humbjen në terenin shqiptar ta mbulon me votat e minoriteteve, me votat e disa fraksioneve dhe partive më të vogla”, deklaroi Mexhiti.

Sipas Mexhitit, ky Front Europian është bashkuar vetëm për interesa personale dhe politike dhe nuk i bashkon ideali. Siç thotë, menjëherë pasi t’i humbin zgjedhjet, nuk do të bëjnë as 24 orë bashkë dhe do të përçahen.