Mësuan online, testohen me prani fizike – maturantët japin provimin e dytë ekstern

TË FUNDIT

Pas një viti me “mësim online”, nxënësit e shkollave të mesme për herë të dytë, me maska e distancë, u ulën në bankat shkollore. Iu nënshkruan testit e dytë ekstern, gjegjësisht provimin për lëndën që kanë zgjedhur, matematikë, gjuhë të huaj, filozofi ose estetikë.

Drejtori i shkollës së mesme “Zef Lush Marku”, Faruk Zeqiri, thotë se u kanë munguar nxënësit në objektin e shkollës dhe shpreson se në shtator do t’i kthehen normalitetit.

“Definitivisht na kanë munguar nxënësit gjatë këtij viti shkollor. Kjo është hera e parë prej fillim të pandemisë që ne kemi nxënës në shkollën tonë. Gjithçka është duke rrjedhur ashtu siç duhet sipas të gjitha protokolleve të parapara për realizimin e maturës shtetërore”, deklaroi Zeqiri.

Nxënësit mësim në distancë e kanë ndjekur përmes platformës online “Microsoft Teams”, e kjo ka ndikuar negativisht në suksesin e tyre.

“Sipas analizave për shkak se dje ka përfunduar viti shkollor 2020-2021, kemi ngecje te disa nxënës që kanë treguar suksese më të dobëta se ne prezencë fizike. Mirëpo shpresojmë që vitin e ardhshëm shkollor do të jetë gjithçka në rregull dhe do të fillojmë me prezencë fizike dhe do të përmirësohet gjendja”, shtoi më tej ai.

Ky vit shkollor në kohë pandemie, ka kaluar me rezultate të mira thotë ministrja e Arsimit Milla Carovska.

“Në fillim të vitit shkollor do të bëjmë testim me qëllim që ta shohim a kemi humbje në procesin arsimor ku po paraqitet në të gjithë botën në të gjithë shtetet. Këtë e bëjmë që tu ndihmojmë nxënësve t’i tejkalojnë të gjitha mangësi që po paraqiten për shkak mënyrës së re për mësim”, tha Carovska.

Ende nuk dihet se si do të zhvillohet procesi mësimor 2021/2022. Ministria e arsimit dhe shkencës në bashkëpunim me Komisionin për mbrojtje nga sëmundjet infektive dhe Ministria e shëndetësisë do të vendosin se si do të realizohet mësimi, ndërsa çdo vendim do të varet nga situata me koronavirusin.

TË NGJAJSHME