Ish-presidenti rus Dmitry Medvedev, ka deklaruar se Moska do të duhej të përdorë armë bërthamore nëse kundërsulmi i vazhdueshëm i Kievit do të jetë i suksesshëm.
Medvedev, i cili është nënkryetar i Këshillit të Sigurimit të Rusisë, një organ i kryesuar nga Presidenti Vladimir Putin, tha në një mesazh në llogaritë e tij zyrtare në mediat sociale se Rusia do të detyrohej të tërhiqej në doktrinën e saj bërthamore, në një skenar të tillë.
“Imagjinoni sikur ofensiva, e cila mbështetet nga NATO, të ishte e suksesshme dhe të na shqyenin një pjesë të tokës, atëherë ne do të detyroheshim të përdorim një armë bërthamore sipas rregullave të një dekreti të presidentit të Rusisë. Thjesht nuk do të kishte alternativë tjetër. Kështu që armiqtë tanë duhet të luten për suksesin e luftëtarëve tanë. Ata po sigurohen që një zjarr bërthamor global të mos ndizet”, tha ai.
Medvedev duket se po i referohej një pjese të doktrinës bërthamore të Rusisë, e cila përcakton se armët bërthamore mund të përdoren si përgjigje ndaj agresionit kundër Rusisë të kryer duke përdorur armë konvencionale që kërcënojnë ekzistencën e shteti rus. Ukraina po përpiqet të rimarrë territorin të cilin Rusia e ka aneksuar dhe e ka deklaruar si pjesë të territorit të saj, një veprim i dënuar nga Kievi dhe pjesa më e madhe e Perëndimit.
Putin tha të shtunën se nuk kishte ndryshime serioze në fushën e betejës për të raportuar ditët e fundit dhe se Ukraina kishte humbur sasi të mëdha të pajisjeve ushtarake që nga 4 qershori.
Nga ana tjetër, Kievi thotë se forcat e tij po bëjnë njëfarë përparimi në përpjekjet e tyre për të rimarrë territorin, megjithëse me një ritëm të ngadaltë./ Reuters