Seanca për votimin e ndryshimeve kushtetuese në Kuvend ka mbetur pezull përshkak mos mbështetjes së opozitës maqedonase. VMRO-DPMNE nuk bindet që të ndihmojë në arritjen e 80 votave të nevojshme, pasi konsideron se ndryshimet kushtetuese po bëhen nën diktat bullgar. Edhe pse ende jozyrtarisht, tashmë është paralajmëruar se në fund të muajit, me shumë gjasa 29 tetor, në Shkup do të arrijë Kryetarja e Komisionit Europian Ursula Von der Lejen. Po a do të jetë kjo një përpjekje e radhës e aleatëve për ta bindur opozitën? Deputetja e BDI-së Arta Bilalli Zendeli, për TV21 tha se nuk përjashtohet mundësia që seanca e votimit të hapet nëse kryetarja e Komisionit Europian, Von der Leyen arrin të bindë deputetët, megjithatë është skeptike se kjo mund të arrihet me një vizitë të Von Der Lejen.
“Mundet, asgjë nuk e ndalon. Pjesa procedurale çdo gjë është në rregull. Në çdo moment mund ta thirrë kryeparlamentari Talat Xhaferi”, tha Arta Bilalli Zendeli, deputete e BDI-së.
-Po mirëpo ka thënë se në momentin kur t’i sigurojmë numrat.
“Po, po. Nëqoftëse sigurohen me ardhjen e eurokomisioneres Fon Der Leyen se janë numrat, nuk përjashtohet munësia që të jetë edhe ajo ditë”, shtoi Arta Bilalli Zendeli, deputete e BDI-së.
-Është kjo një indikacion që ardhja e saj mund të jetë bindje shtesë për deputetët e VMRO-DPMNE-së? A është ky qëllimi i ardhjes së saj?
“Nuk ma merr mendja që me një ardhje apo me një kontakt dikush mund të bindet”, pohoi Arta Bilalli Zendeli, deputete e BDI-së.
Për ardhjen e Von der Leyen dhe qëllimin e saj e pyetëm edhe kryeministrin Dimitar Kovaçevski. Ai thotë se nuk mund të përdorë terme të tilla si “bindje” të deputetëve, megjithatë nuk përjashton se një nga temat do të jetë edhe vazhdimi i rrugës eurointegruese, që nënkupton diskutim për ndryshimet kushtetuese.
“Vizita është në karakter të mund të bisedojmë për procesin e skriningu, për investimet që Bashkimi Europian i ka bërë në vendin tonë ndërsa një nga temat kryesore është edhe vazhdimi i rrugës eurointegruese sepse ne jemi më i mirë për momentin në rajon. Nuk mund të përdorë fjalë si “bindje”. Metafora të tilla di të përdorë vetëm opozita. Unë gjithnjë përpiqem të përdorë fjalor adekuat të shprehjes para mediave. Mendoj se vjen një mik i madh i shtetit tonë me të cilën do të kemi mbledhje të frytshme edhe unë edhe presidenti i vendit, gjithsesi dhe anëtarët e Qeverisë”, pohoi Dimitar Kovaçevski, kryeministër.
Sa i përket opozitës, VMRO-DPMNE assesi nuk ndryshon qëndrim dhe vazhdon të thotë se nuk do t’i mbështesin nën këto kushte. Nga ana tjetër Zeqirija Ibrahimi në TV21 konfirmoi se opozita shqiptare do të kushtëzon ndryshimet kushtetuese me heqjen e termit 20% për gjuhën shqipe, si dhe të përfshihet edhe propozimi i tyre sa i përket luftës së krimit dhe korrupsionit. Përndryshe seanca për ndryshimet kushtetuese u hap më 18 gusht të këtij viti dhe në po të njejtën ditë përfundoi debati ndërsa për ditën e votimit, u tha se do të caktohet sapo të sigurohen 80 deputetët e nevojshëm. Propozimi për fillimin e ndryshimeve kushtetuese u votuan me 70 vota pro dhe 47 kundër.