Më shumë të infektuar grupmosha 40-49 vjeçe

Më shumë të infektuar janë persona të grupmoshës 40-49 vjeçe. Këtë e tregon raporti i Institutit për shëndet publik, sipas së cilëve, është rritur numri i viktimave në nivel javorë, ndërsa është ulur numri i rasteve të reja dhe personave të shëruar. Drejtori, Shaban Memeti, për TV21 thotë se ndryshim i tillë i strukturës së moshës ka të bëjë me mosrespektimin e masave nga të rinjtë.

Në bazë të anketave epidemiologjike në periudhë prej 13 deri më 19 korrik, janë bërë 8161 teste dhe janë regjistruar 1038 raste pozitive me Kovid-19, me çka janë 35 raste më pak sesa javën e kaluar. Raste të reja janë regjistruar në 26 qytete, ndërsa numri më i madh i të infektuarve është në Shkup – 39.9% dhe Shtip 14.4%. Në 17 qytete të vendit, në periudhën e njëjtë,  numri i rasteve të reja është nën 20.

Sipas Memetit, vatër tjetër është edhe rajoni i Pollogut, përkatësisht Tetova dhe Gostivari ku dihen klasterët dhe mënyra e transmisionit të virusit.

Në periudhë prej 13 deri më 19 korrik, janë regjistruar 44 viktima, që janë tetë më shumë në krahasim të periudhës së mëparshme. Pjesa më e madhe e rasteve janë persona mbi 60 vjeç, 81.8%. Bilanci i djeshëm me 10 të vdekur është i katërti më i keq në Maqedoni që nga fillimi i krizës, pasi që kulminacioni u arrit në fillim të muajit kur u regjistruan 15 viktima. Autoritetet apelojnë se vetëm me mbajtjen e maskave mund të ndihmojmë në ndalimin e krizës me Kovid-19.