Më në fund u gjet mjek për në Shutkë, ende nuk ka nisur me punë dhe askush se di kush është!

TË FUNDIT

Sot është dita e romëve, ndërsa vetëm një ditë përpara u gjet mjeku amë që do të punojë në Poliklinikën e Shuto Orizares.
Këtë e paralajmëroi Ministri i Shëndetësisë Venko Filipçe.

“Gjetëm zgjidhje afatgjate për problemin e mjekut amë në Shuto Orizare, pas gjashtë tentativave të pasuksesshme”, njoftoi ministri i Shëndetësisë, Venko Filipçe.

Për ta parë mjekun amë dhe se ku do të punojë shkuam tek Poliklinika në Shuto Orizare, por atje nuk e gjetëm.

E as personeli tjetër mjekësor nuk ishte në dijeni se kush do të jetë mjeku i ri.

“Edhe ne nga lajmet dëgjuam, por askush nuk e di.
Ende nuk ka ardhur?
Do të pyesni në drejtori, nuk e dimë edhe ne”, thanë nga Poliklinika e Shuto Orizares.

Banorët e Shuto Orizares, thonë se prej kur dolën në pension tre mjekë, kjo shtëpi e shëndetit ka mbetur pa mjek amë.

“Duhet të ketë mjek, kanë shkuar disa në pension dhe askush nuk po i zëvendëson, ne shkojmë tani në tjetër vend nuk ka këtu në Shuto Orizare.
Nuk ka mjek amë?
Jo nuk ka.
E tani ku shkoni të bëni kontrolle?
Në anën tjetër të rrugës ka privat.
Prej sa kohësh nuk keni mjek amë?
Po nuk ka 5-6 muaj, ata që ishin shkuan në pension dhe tjerë nuk kanë ardhur”, deklaroi ky banor i Shutkës.

E sa i përket kushteve të Poliklinikës, banorët thonë se lënë shumë për të dëshiruar.

Ata ankohen për pastërtinë si dhe mungesa tjera që ka kjo poliklinikë.

“Poliklinika jonë në Shuto Orizare është për askund.
Është katastrofë të hyni brenda të shihni se si është brenda e gjitha është e pistë, nuk ka kushte nuk kanë injeksione. Mjekët tanë në vetëm për receta qëndrojnë këtu gjithë ditën. Është katastrofë”, tha një banor i Shutkës.

Pyetëm edhe ministrin e Shëndetësisë Venko Filipçe se kush do të jetë mjeku amë në Poliklinikën në Shuto Orizare. Ai tha se do të tregoj pas press konferencës.

“Kush do të jetë mjeku amë në Poliklinikën e Shuto Orizares?
Po ka aplikuar,…. në shtëpinë e shëndetit publik. Emrin më lejoni tua tregoj pas konferencës. Është e rëndësishme që bëhet fjalë për një institucion në të cilin do të kyçen më shumë mjek dhe infermierë në sistem që do të garantoj që zgjidhja është afatgjate”, deklaroi Filipçe.

Kërkuam përgjigje edhe me shkrim në Ministrinë e Shëndetësisë për emrin e mjekut, por deri në fillimin e këtij edicioni të lajmeve nuk morëm përgjigje.

TË NGJAJSHME