Me lojëra politike deri në pagë minimale?! Jovanoviq: As këtë rritje nuk do ta bënin, por janë të detyruar

Në vend të pagës minimale 500 euro, sa kërkoi sindikata, ajo u rrit për 1800 denarë. Për një pjesë të ekspertëve vendimi i qeverisë ishte i pritur. Branimir Jovanoviq nga Instituti i Vjenës thotë se qeveria as këtë rritje nuk do ta bënte, por tashmë është vendosur në ligj dhe janë të detyruar. Sipas tij, kjo do të ketë efekte negative sociale dhe do t’i godasë më të varfrit.

“Rritja e pagës reale është e ngadalësuar, nga 11% para se të vijë qeveria, në nën 4% në janar. Deri në mes të vitit, rritja reale me shumë gjasa do të jetë zero, që do ta ngadalësojë konsumin që ishte motori kryesor për rritje në vitet e fundit. Në kushte të krizës globale dhe luftës tregtare, kur eksporti dhe investimet pritet të ulen, nuk është reale të goditen pagat dhe konsumi”, tha Branimir Jovanoviq.

Por si zhvillohej saga për pagën minimale. Në fillim të dhjetorit kryeministri doli nga seanca e Këshillit socio-ekonomik dhe tha:

“Ne nuk duam të përzihemi. Do të lëmë që dy palët, përkatësisht punëtorët dhe punëdhënësit të merren vesh për atë se çfarë është e pranueshme për dy palët. Ne jemi këtu për ta lehtësuar procesin e jo të marrim vendime. Ne si qeveri jemi këtu ta përkrahim gjithçka që do të dakordojnë ata”, tha Hristijan Mickoski.

Pastaj u tërhoqën anëtarët e Komisionit për përfaqësim që duhet të caktojë se cila sindikatë është reprezentative. Në moment të fundit emëruan anëtarë të rinj. Nuk u mbajt seancë e Këshillit socio-ekonomik. Për momentin ende nuk ka sindikatë përfaqësuese.

“Sot do të kalojmë një informacion sipas ligjit, mendoj se paga minimale do të arrijë 24 mijë denarë. Kështu është sipas ligjit. Aktualisht nuk kemi as sindikatë reprezentative në Këshillin socio-ekonomik. U formua Komision që do ta caktojë përfaqësimin. Shpresoj se së shpejti, ata që do të jenë përfaqësues të punëtorëve, bashkë me punëdhënësit do të arrijnë konsensus. Ne thamë konsensusin që do ta arrijnë ata ne si qeveri do ta respektojmë”, deklaroi Mickoski.

Për sindikalistët paga minimale është kundër ligjit.

“Për herë të parë kur është sjellë paga minimale në 2012, për pagën minimale u soll vendim pa punëtorët”, tha Tërpe Deanoski.

Me këtë nuk pajtohet zëvendësministri.

“Absolutisht është sipas ligjit dhe mendoj se për të ardhmen është lënë hapësirë në këtë dialog social ku marrin pjesë tri palë, qeveria, punëdhënësit dhe sindikatat, nëse merren vesh sindikatat reprezentative, ne si qeveri do ta respektojmë këtë”, u shpreh Marjan Risteski

Sipas Jovanoviq tani me pagën minimale nga 24 mijë denarë ose më pak se 400 euro, vendi është e fundit në rajon, ndërsa para një viti, printe në rajon.