Me Bentley në mes të sheshit! Për Spasovskin dhe Shilegovin gjoba 45 euro është shumë pak

Ndonëse është e ndaluar, mbrëmë kjo makinë e tipit Bentley, qarkulloi nëpër sheshin e Shkupit. Menjëherë më pas shoferi është ndaluar nga policia dhe është u gjobitur me 45 euro, për shkelje të rregullave të komunikacionit. Faturën e gjobës e postoi në rrjetet sociale kryetari i qytetit të Shkupit. Sot Shilegov tha se gjoba prej 45 euro është vetëm fillestare.

“Për mua është mirë që kemi intervenuar shpejt, ne si Qytet i Shkupit dhe MPB, për të identifikuar kryerësin e veprës, por ajo që është si gjobë nuk do të thotë që do të ndalet procedura, sepse ka edhe elemente serioze për kryerjen e veprës penale, për cenimin e sigurisë së qytetarëve”, tha Shilegov.

Gjatë ditës këtë rast e dënoi edhe ministri brendshëm Oliver Spasovski, ndërsa tha se  

45 euro gjobë nuk është mjaftueshëm.

“Kemi qytetarë të tillë të pandërgjegjshëm të cilët sillen në mënyrë joadeukate, në kushte të tilla të lëvizin në shesh apo trotuare , të parkohen ku u kujtohet. Nga kjo ngjarje me rëndësi është se policia menjëherë reagoi dhe gjeti personin. Nëse më pyetni a është dënimi i mjaftueshëm, nuk është i mjaftueshëm. Megjithatë këtu duhet të mendohet të bëhen ndryshime në ligj, që për këto raste specifike të parashihen dënime më drastike”, tha Spasovski.

Gjatë ditës së sotme tek vendi ku hyri Bentley kishte edhe policë dhe kishin vendosur disa shtylla për të bllokuar hyrjen e makinave.

Ndryshe në rrugën Maqedonia vazhdimisht qarkullojnë makina. Autoritetet më herët thonin se do të vendoset një rampë elektronike, por një gjë e tillë ende nuk ka ndodhur.