Me 2 miliardë euro hua – borxhi publik arrin 64.7%! Këshilli Fiskal: Me kredinë britanike do të rritet borxhi publik

Huaja nga Mbretëria e Bashkuar do ta rrisë borxhin publik të vendit – alarmon Këshilli Fiskal. Llogaritjet janë bërë sipas dy skenarëve dhe vetëm për një hua prej 2 miliardë nga gjithsej 6 miliardët e planifikuara. Sipas skenarit të parë, nëse shteti nga viti 2027 deri më 2029 merr hua më intensivisht, borxhi do të kërcejë deri në 64.7% të BPV-së. Në këtë rast, huamarrja vjetore do të arrinte 667 milionë euro. Me skenarin e dytë, që sipas Këshillit është më i qëndrueshëm, nëse shteti huazohet në mënyrë më të moderuar nga viti 2027 deri më 2032, borxhi do të arrinte 63% të BPV-së, përkatësisht huazimi vjetor do të ishte deri 400 milionë euro.

“Këtu janë përfshirë ato informacione që kemi në dispozicion deri sot, pra ligji që u miratua në parlament, por pa të dhëna konkrete, pa kushte konkrete të huamarrjes, sepse ato nuk janë publikuar dhe nuk i kemi. Por ne bëmë supozime hipotetike, çfarë do të ndodhte nëse do të merreshin edhe dy miliardë euro të tjera hua dhe këto skenarë janë paraqitur”, tha Gligor Bishev – Këshilli Fiskal.

Nga Këshilli bëjnë apel për konsolidim fiskal. Ata nuk janë të shqetësuar për mbledhjen e të ardhurave nga taksat në arkën shtetërore. Thonë se ky aspekt po ecën mirë, me një mungesë të vogël te të ardhurat nga TVSH-ja. Por problem mbetet fakti që pjesa më e madhe e buxhetit shkon për transfere sociale.

“Dy të tretat e gjithë shpenzimeve publike janë të destinuara për fondet sociale dhe mbrojtjen sociale. Pra, nëse e marrim komponentën totale në anën e shpenzimeve të buxhetit, buxheti ynë dominohet nga komponenta sociale. Na mbetet shumë pak hapësirë për komponentën ekonomike”, u shpreh Abdulmenaf Bexheti – Këshilli Fiskal.

Ata theksojnë se janë të nevojshme reforma për rritjen e ekonomisë. Strategjia kombëtare për zhvillim tregon se pa reforma strukturore, shteti nuk do të ecë përpara – rritja mesatare e BPV-së do të jetë mes 2.5 dhe 3%. Ndërkohë që reformat do ta rrisnin rritjen ekonomike deri në 4.5%.