Në ora 21 u mbyllën vendvotimet.
Menjëherë filloi numërimi i votave për të përcaktuar fituesin e zgjedhjeve parlamentare 2020.
E partitë politike filluan të mbajnë konferenca për media duke kumtuar rezultatet e tyre.
Dy kryetarët e partive ASH-AAA Ziadin Sela dhe Afrim Gashi dolën para mediave.
E dikush kishte menduar për t’i penguar, mbase edhe pa dashje.
Muzika e lartë e lëshuar aty afër në një lokal, u vështirësonte komunikimin dy kryetarëve të partive.
“Sela:Po po, por çfarë të bëjmë?
Gashi: I bie sikur ne e kemi lëshuar.
Sela: Fillimisht ato oponentët tanë pranë që na kanë lëshuar muzikën këtu ne nuk po dëgjohemi nuk është aspak korrekte”.
E nga Bashkimit Demokratik për Integrim kishin lëshuar muzikë, por kësaj radhe me dëshirën e tyre për të festuar.
Nuk mungoi as fjala patriotike
“Shiponjat u kthyen në folenë e tyre”, tha kreu i BDI-së, Ali Ahmeti.
Nga Tetova u lajmërua edhe kryetari i PDSH-së Menduh Thaçi.
“Më në fund u bëna deputet, ndoshta është pak cinike por jam i vetëdijshëm se të gjithë projektantët që kanë punuar për ta zhbërë, sonte ju ka hyrë një thikë në zemrën e tyre”, u shpreh kryetari i PDSH-së, Menduh Thaçi.
E para selisë së VMRO-DPMNE-së kishin ardhur disa simpatizantë të LSDM-së duke brohuritur.
“Mund të them se VMRO-DPMNE, ka fituar në shumë qytete, Aerodrom, Gazi Babë, Kisella Vodë, Gjorçe Petrov, Butel, Kavadar, Sveti Nikollë, Makedonska Kamenicë, Pehçevë, Veles, Gradski Ohrid, Prilep, Ilinden, Petrovec. Gjithesi modeli i Dontit këtë garë e bën mjaftë të paqartë”, theksoi Igor Janushev nga VMRO-DPMNE.
Ndërsa gjatë paraqitjes së Zoran Zaevit, partneri i tij i koalicionit Mundemi, Bilall Kasami, nuk u pa bashkë në pres konferencën ku Zaev kumtoi fitoren.
“Me një fitore bindëse dhe një përparësi stabile për momentin me 3 deputetë para VMRO-DPMNE-së”, tha kryetari i LSDM-së, Zoran Zaev.
Mbrëmë në konferencë për media nuk doli as kryetari i VMRO-DPMNE-së Hristijan Mickoski.
Festat e partive që fituan kanë vazhduar deri në orët e para të mëngjesit.