“Ju lutem të gjithë të pranishmit të mbajnë një minutë heshtje për të gjitha gratë që sot nuk janë me ne, sepse sistemi nuk i mbrojti”.
Nën moton “Nuk do të zhdukemi”, me pankarta “Nuk ka liri pa gra të lira”, “Mos prisni gjak, veproni menjëherë”, “Përshëndetje, sa buqeta vlen jeta juaj?”, “Trëndafila të gjakosur për ju, zonjë”… qindra qytetarë marshuan në protestën e 8 Marsit kundër dhunës ndaj grave dhe femicidit. Marshimi filloi në mesditë në parkun “Gruaja luftëtare” në Shkup. Gratë vendosën trëndafilat në tokë dhe kërkuan me zë të lartë drejtësi për gratë viktima të dhunës.
“Si të festojmë kur po luftojmë për mbijetesë, kur çdo ditë vdesin gra?! Jemi të zemëruara, të trishtuara, të inatosura. Jemi të përmbytura nga lajme për përdhunime të ndryshme të trupit dhe dinjitetit të grave. Për dhunë që na kujton çdo ditë realitetin tonë, se gruaja ende duhet të luftojë për jetën e saj, për sigurinë e saj dhe për dinjitetin e saj”, tha një aktiviste.
“Sot qëndroj para jush si një nënë që dëgjoi të qarën e voglës Katja dhe nuk mund të qëndrojë pa reaguar dhe të shohë dhunën para syve të saj. Qëndroj edhe si një fëmijë që ka parë dhunë në shtëpinë e tij dhe nuk pati zë për të kundërshtuar. Dy fëmijë, duke qarë dhe duke u përqafuar me dhimbje, u ngushëlluan në atë moment dhe unë iu thashë se gjithçka do të jetë në rregull. E ngushëllova dhe i dhashë një copë shprese se në këtë botë ekziston drejtësia. Por 45 ditë më vonë, ajo shpresë nuk mjaftoi”, u shpreh një tjetër aktiviste.
Femicidi nuk fillon me goditjen e fundit, por me heshtjen e parë. Dhuna në familje duhet të jetë prioritet numër një i çdo institucioni. Mos qëndroni indiferentë kur shihni dhunë, reagoni, për ta zgjuar këtë shoqëri nga një gjumë shekullor – ishin mesazhet nga marsi i organizuar nga nisma dhe shoqata qytetare. Pjesëmarrësit dërguan mesazhe edhe për institucionet, kryeministrin dhe ministrin e Punëve të Brendshme.
“Si nuk ju vjen turp të dilni në foltore, pas një numri rekord të vrasjeve të grave, për të cilat ishte raportuar dhunë dhe nuk ishte vepruar si duhet, dhe të na thoni që të bëjmë kallëzime dhe mos i tërheqim ato? Ministre, Rosica ju kontaktoi drejtpërdrejt, duke kërkuar me dëshpërim mbrojtje, ndërsa jeta e saj varej nga një fije. Si nuk ju vjen turp të vazhdoni ditët, fjalimet, funksionet tuaja pa shprehur as ndonjë ngushëllim? – deklaroi një aktiviste tjetër.
Nga parku “Gruaja luftëtare”, pjesëmarrësit u drejtuan drejt Parkut të Qytetit për të vendosur lule para bustit të Vera Jociqit. Ata dërguan mesazh se nuk ndihen të sigurta si gra në shoqëri. Thanë se urimet për festa nuk mjaftojnë, nëse paralelisht nuk punohet për çrrënjosjen e dhunës gjinore, pabarazinë ekonomike dhe diskriminimin sistematik.