Lidhja Demokratike e Kosovës (LDK) dhe Aleanca për Ardhmërinë e Kosovës (AAK) kanë arritur sot marrëveshje për bashkëqeverisje.
Lideri i AAK-së, Ramush Haradinaj pas takimit me liderin e LDK-së, Isa Mustafa dhe me kandidatin për kryeministër, Avdullah Hoti, dha detaje rreth marrëveshjes. Ai deklaroi se AAK-ja do t’i ketë katër ministri dhe zëvendësministrin e parë.
“Zëvendësministër i parë, Besnik Tahiri, Ministre e Jashtme, Meliza Haradinaj-Stublla , Minister i Drejtësisë, Selim Selimi, Ministër i Zhvillimit Ekonomik Blerim Kuçi, ministër i Arsimit Ramë Lika”, bëri të ditur Haradinaj.
RTV21 ka siguruar marrëveshjen e plotë mes LDK-së dhe AAK-së. Në marrëveshje, LDK dhe AAK thonë se pajtohen që objektivat e qeverisjes në krye me Avdullah Hotin do të jenë beteja për ta mposhtur pandeminë e COVID-19, përmbyllja e dialogut me Serbinë me njohje reciproke, rimëkëmbja e ekonomisë pas pandemisë, forcimi i shtetit ligjor përmes luftës kundër krimit dhe korrupsionit, dhe forcimi i partneritetit me Bashkimin Evropian dhe Shtetet e Bashkuara të Amerikës./21Media