Marrëveshja e Ohrit dorëzohet në arkivin shtetëror, 20 vite dokumentin e ka ruajtur vetëm Ilir Luma nga Tetova

Dokumenti origjinal i Marrëveshjes së Ohrit që dëshmon për vendosjen e paqes më 13 gusht të vitit 2001, tashmë gjendet në hapësirat e Arkivit shtetëror. 20 vite të plota nga nënshkrimi, deri më tani nuk ka mundur të gjendet asnjë ekzemplarë. Zëvendëskryeministri Artan Grubi tha se kanë kontaktuar me gjithë zyrat e shtatë nënshkruesve të cilëve u është dhënë nga një ekzemplar, por nuk ka arritur të gjejnë asnjë dokument origjinal. Dokumenti që sot u dorëzua në Arkiv është ai i cili i është dhënë kryetarit të PPD, Imer Imerit, që ishte një prej nënshkruesve. Ilir Luma nga Tetova, anëtar i PPD-së, e ka marrë dokumentin nga partia dhe është kujdesur për këtë dokument dy dekada të plota.

Njeriu i parë i Arkivit shtetëror, Emil Kërsteski thotë se dokumenti origjinal i Marrëveshjes së Ohrit është i rëndësishëm për vendin tonë. Edhe pse është nga historia më e re, ai dokumenti i hap perspektivat në çdo aspekt.

Ngjarja kryesore e shënimit të 20 vjetorit të Marrëveshjes së Ohrit do të mbahet të premten, ku prezencën e tyre e kanë konfirmuar edhe disa persona që kanë marrë pjesë në arritjen e kësaj marrëveshje.

Marrëveshja e Ohrit u nënshkrua më 13 gusht të vitit 2001 në Ohër, me të cilën iu vendos fundi konfliktit në vend. Nënshkrues ishin Presidenti i atëhershëm, Boris Trajkovski, kryetarët e katër partive politike – kryetari i LSDM, Branko Cërvenkovski, i VMRO-DPMNE, Lupço Georgievski, i PDSH, Arbën Xhaferi dhe PPD, Imer Imeri. Firmën e tyre si garantues e vendosën edhe Xhejms Perdju dhe Fransoa Leotar.