Maqedonia, shteti mbijeton nga donacionet?! Na dhurojnë vaksina, uniforma ushtrie e makina policie

TË FUNDIT

Nuk kalon javë që Maqedonia të mos marrë ndonjë donacion nga diku. Ushtria, policia, shëndetësia e fusha të tjera duket se mbijetojnë nga dhuratat që marrin.

Shpërthimi i pandemisë e gjeti aq të papërgatitur shtetin sa që në 2020 erdhën shumë aeroplanë me donacione si pajisje mbrojtëse, teste të shpejta e respiratorë. E sa u rehatuam me këto, nisën të prodhohen vaksinat, por për këtë Maqedonia u desh ta zgjasë dorën, sepse vetë nuk arriti të sigurojë, edhe pse paratë nuk mungonin. Sasia më e madhe erdhi nga Serbia.

“Në emër të gjithë popullit maqedonas dhe emër të Qeverisë, falënderim i madh deri te populli vëllazëror, mik, popullit serb që ndau me ne në momente të këtilla domethënëse shuma të mëdha të vaksinave”, deklaroi kryeministri Zoran Zaev më datë 01.04.2021.

Krahas sistemit shëndetësisë, peshqeshe shpesh merr edhe Ushtria. I fundit është donacioni me 7.400 uniformave që Turqia i dha Armatës dhe atë pikërisht në Ramazan.

“Realizimi i kësaj ceremonie në muajin e Ramazanit që përkon me virtytin e ndarjes dhe solidaritetit edhe më shumë e përforcon domethënien e bashkëpunimit mes forcave tona ushtarake”, njoftoi ambasadori i Turqisë në vend, Hasan Mehmet Skozkok.

Përskaj gjërave më të thjeshta, siç janë maskat e pajisje të tjera, kohë më parë Ushtria si dhuratë mori edhe 1200 automatikë M-4 të dhuruara nga ShBA-të.

Pa donacione nuk ka mbetur as Ministria e Brendshme. Muaj më parë Gjermania i dhuroi makina dhe pajisje të tjera në vlerë totale 660 mijë euro.

“Donacion prej 22 makinave për terren, kamera termale, aparate për kontroll të dokumenteve, pajisje për ndalim me force të makinave dhe pajisje të tjera”, tha ambasadorja e Gjermanisë, Anke Holshtajn.

Vitin që lamë pas, nga ShBA-të, MPB mori donacion me pajisje në vlerë rreth 460 mijë dollarë. Policia ka marrë po ashtu edhe dhurata të shumta në fusha të tjera.

Para një muaji, Maqedonia e Veriut nuk u gjet mes 17 vendeve-anëtare dhe 3 vendeve-aderuese që morën gjithsej 530 milionë euro për luftë kundër koronavirusit nga Bashkimi Evropian. Në shpjegimin nga Qeveria, thanë se për shkak të organizimit të shpejtë dhe efikas të institucioneve shtetërore, ishte siguruar sasi e madhe donacionesh në luftën kundër Kovid-19, andaj nuk janë bërë harxhime të mëdha shtetërore. Si rrjedhojë, nuk është arritur pragu të cilin e projektoi BE-ja prej 30,8 milionë eurove.

TË NGJAJSHME