LSDM akuzon se kryeministri gënjen, Mickoski: Hristovski është profesionist dhe viktimë e përndjekjes

Socialdemokratët thonë se deklarata e kryeministrit Hristijan Mickoski se drejtori i ri i Agjencisë për Siguri Kombëtare, Bojan Hristovski është depolitizuar është gënjeshtër e pastër. Në ndërkohë ai u largua nga funksionet partiake, por sipas LSDM-së, të gjitha postimet e Hristovskit në rrjetet sociale janë partiake dhe si propagandë për Mickoskin. Nga kjo parti opozitare shtojnë gjithashtu se Hristovski ka qëllime të fshehura kundër Agjencisë që tani e menaxhon.

“Më 1 shtator të këtij viti Hristovski do të shkruajë, citoj “Uroj ditëlindjen e pestë dhe të fundit të Agjencisë për Siguri Kombëtare”. Parashtrohet pyetja nëse Hristovski me urdhër partiak do të punojë për shkatërrimin e ASK-së?”, tha Metodija Ilievski, LSDM.

Nga ana tjetër Mickoski përsëriti se po përgatitet plan për bashkimin e Agjencisë për Siguri Kombëtare dhe Agjencisë për Kundërzbulim që është nën kompetencat e presidentes Gordana Siljanovska-Davkova.

“Ky është rezultat i nevojës për reforma, jo për shkak se tani dikush ka frustrime personale dhe do t’i bashkojë këto agjenci. Ashtu është bërë në pjesën më të madhe të aleateve tona në NATO”, pohoi Hristijan Micksoki, kryeministër.

Mickoski përsëri në mbrojtje të emërimit të Hristovskit, duke theksuar se pa arsyetime në të kaluarën i ishte marrë certifikata e sigurisë.

“Absolutisht besoj në kapacitetet profesionale të Bojan Hristovskit si kuadër që përmes procedurës së drejtë gjyqësore në të kaluarën tregoi dhe dëshmoi se është viktimë e mobingut dhe përndjekjes politike”, tha Hristijan Micksoki, kryeministër.

Reformat në shërbimet e sigurisë paralajmërohet se do të ndodhin në fillim të vitit të ardhshëm. Deri atëherë pritet që Bojan Hristovski të jetë në krye të ASK-së, ndërsa me Agjencinë për kundërzbulim për momentin udhëheq Gabriella Jakovleva.