Është e vërtetë se në rrugën evropiane të shteteve të Ballkanit Perëndimor paraqiten probleme, por këto ato në shumicën e rasteve vijnë për shkak të mjegullimit të perspektivës evropiane për të gjitha vendet e rajoni, thotë për TV21 Presidenti i Malit të Zi, Millo Gjukanoviq. Reformat e vështira duhen përmbushur, por shton se ngecjet gjenerohen prej lodhjes, e më pas nga pavendosmëria e Bashkimit Evropian për politikat e zgjerimit, të cilat, sipas Gjukanoviqit ishin ndër më të suksesshmet e BE-së, por për fat të keq kishte ngecje kur erdhi në rend të ditës për Ballkanin Perëndimor.
“Unë mendoj se kjo ngecje le hapësirë për ndërhyrje të palëve të treta. Për fat të keq këto palë të treta dalin me platforma të cilat janë në kundërshtim me interesat themelore evropiane dhe kjo sjell konfuzion shtesë në politikat e Ballkanit Perëndimor. Siç shihni tani ne për fat të keq jemi dëshmitarë të ideve të rinovuar për ridefinim të Ballkanit”, tha për TV21, Millo Gjukanoviq – President i Malit të Zi.
Në intervistën dhënë për TV21 gjatë Forumit të Prespës për Dialog, Gjukanoviq tha se është e papranueshme për kredibilitetin e BE-së që çështjet bilaterale, siç është ai mes Shkupit dhe Sofjes, të përdoren për ta cenuar perspektivën evropiane të shteteve.
“Nëse me të vërtetë duam të kontribuojmë për stabilitetin edhe evropianizimin e këtij rajoni, duhet të fillojnë negociatat me këto dy shtete, duhet të bëhet liberalizimi i vizave me Kosovën dhe duhet që të jepet impuls shtesë për procesin negociues me Malin e Zi dhe me Serbinë”, deklaroi për TV21, presidenti i Malit të Zi, Millo Gjukanoviq.
Gjukanoviq, që ka 20 vite në skenën politike të Malit të Zi, foli edhe për rezervat e Malit të Zi ndaj të ashtuquajturit “Mini-shengen”, të cilin tani për tani e mbështet Shkupit, Tirana dhe Beogradi. Tha se ndaj kësaj nisme ka parashtruar dy pyetje.
“Kam pasur dy dilema. E para, të mos i shumojmë nismat rajonale. Më duket se tashmë kemi një rrjetë të iniciativave rajonale, në të cilat vetë kemi filluar të ngatërrohemi. Pyetja ime ka qenë çfarë sjellë të re kjo nismë rajonale nga ajo që kemi tashmë me Procesin e Berlinit. Ende nuk kam marrë përgjigje se cila është ajo e re e që nuk është përfshirë në Procesin e Berlinit. Pyetja e dytë që kam bërë është se mos ndokush mendon që duke na ofruar Mini Shengen, na ofron alternativë për anëtarësim. E kjo është diçka që asnjëherë nuk do ta pranonim. Ne dëshirojmë anëtarësim”, theksoi Gjukanoviq për TV21.
Sa i përket çështjes mes Kosovës dhe Serbisë, Presidenti I Malit të Zi tha se kjo çështje u takon drejtuesve aktual të dy shteteve. Ajo që patjetër duhet të kuptohet nga të dyja palët, sipas Gjukanoviq, është që duhet të kuptojnë se qasja ekskluzive ndaj çështjeve nuk do të çojë deri tek qëllimi.