Limani: BDI në drejtim të shkrirjes në LSDM! Në “grupin e zjarrit” janë: Mexhiti, Duraku, Xhaferi, Bexheti”

“Ne nga sot, kryeministri Zaev dhe ne do të jemi një për të mirën e qytetarëve”, deklaroi Artan Grubi.

Në ditën e parë të punës, më 2 shtatorë të vitit 2020 kur edhe u bë zv/kryeministër i parë, Artan Grubi tha që jemi një me kryeministrin Zaev.

Ndërsa mbrëmë në Click Plus të TV21 tashmë ish-anëtar i BDI-së Fatmir Limani tha se veprimet e BDI-së po dërgojnë në shkrirjen në LSDM.  Ai tha se kjo është edhe njëra ndër arsyet se pse u largua nga BDI.

 “Ne nuk jemi duke zhvilluar politik autoktone, si strukturë dhe si subjekt politik i BDI-së, por shoh elemente se shkojmë drejt bashkim-shkrirjes në LSDM. Kjo është edhe një arsye e largimit tim dhe kjo është e shpalljes së kandidaturës time si kandidat i pavarur. Nëse jo këto zgjedhje në zgjedhjet e ardhshme mund të dalin me lista të përbashkëta”, tha Fatmir Limani.

Por vallë a mund të ndodhë vërtetë një shkrirje e BDI-së në LSDM. Nga partia e Zoran Zaevit me përgjigje:

 “BDI ka platformën e vet politike, LSDM ka platformën e vetë pulitke, mendoj se është e panevojshme të komentojmë”, u shpreh Konstadin Konstadinov nga LSDM.           

Tashmë një kohë të gjatë në opinion ka dalë i ashtuquajturi “Grupi i zjarrit” nga anëtarë të revoltuar të BDI-së. Ndërsa Limani mbrëmë i ceki me emra dhe mbiemra:

 “Izet Mexhitin e ke, Sadulla Durakun e ke, Musa Xhaferin, Blerim Bexhetin”. Azbi Liken ku e ke?”, shtoi Fatmir Limani.

Raportet e grupit të revoltuar mund të vërehen edhe nëpër mbledhje që bënë BDI.

Në shënimin e 8 vjetorit të komunës së Kërçovës, Sadulla Duraku i cili qëndronte gjithnjë afër kryetarit Ahmeti, mbrëmë ishte në një tavolinë tjetër, ndërsa emrat tjerë që i përmendi Limani nuk morën pjesë në këtë manifestim.

Gjatë ditës së sotme kërkuam përgjigje edhe nga Bujar Osmani, Artan Grubi, dhe Blerim Bexheti për deklaratën e Fatmir Limanit, sa i përket shkrirjes së BDI-së në LSDM, por nuk morëm përgjigje.

Ndryshe në zgjedhjet e fundit komunale  BDI-LSDM kishin koalicion në raundin e dytë të zgjedhjeve.