Ligjin për Shoqata në Komisionin e Venecias! Osmani dhe Millkov me mesazhe për përmirësim të marrëdhënieve

“Një prej temave më të ndjeshme në Maqedoni është mendimi se dikush e vë në pikëpyetje veçantinë, identitetin dhe gjuhën. Ky mendim po përforcohet me provokime nga faktorë të ndryshëm prej Bullgarisë”, tha ministri i jashtëm, Bujar Osmani në takimin e sotëm me homologun e tij bullgar, Nikollaj Millkov.

“Nëse arrijmë që këtë ta lëmë anash, qytetarët e Republikës së Maqedonisë së Veriut, ta ndjejnë miqësinë nga ana e Bullgarisë në lidhje me këtë çështje, më besoni se do të hapet hapësirë për bashkëpunim dhe bisedë për punën e Komisionit historik, për zbatimin e Marrëveshjes për miqësi dhe për zbatimin e protokollit”, tha Bujar Osmani, ministër i Jashtëm.

Osmani nga Sofja tha se Ligjin për regjistrim të shoqatave do ta verifikojë Komisioni i Venecias pasi paraprakisht MPJ-ja bullgare përmes kumtesës reagoi se ndryshimet e këtij ligji janë diskriminuese.

“Këtu do të them publikisht, për shkak se janë kontestuar disa çështje të ligjit, unë do të propozoj që Qeveria t’ia dërgojë ligjin Komisionit të Venedikut që ky i fundit të tregojë nëse ka elemente që janë kontestuese brenda këtij ligji”, pohoi Bujar Osmani, ministër i Jashtëm.

Ministri bullgar Millkov tha se Bullgaria ka interes që ta kthejë frymën pozitive në marrëdhëniet e ndërsjella, gjë që muajve të fundit e harruan të dyja palët.

“Është paradoks që kemi vizion për zhvillim të rajonit ndërsa njëkohësisht për zhvillimin e marrëdhënieve dypalëshe, është paradoks që kemi mekanizma për zgjidhjen e tyre që u caktuan me nënshkrimin e dokumenteve dypalëshe duke e marrë parasysh marrëveshjen e vitit 2017”, pohoi Nikollaj Millkov, ministër i Jashtëm i Bullgarisë.

Deputetët e pushtetit dhe ata të opozitës kohë më parë, me 67 vota PËR, pa asnjë votë kundër, pa asnjë të përmbajtur, votuan ndryshimet e Ligjit për shoqata dhe fondacione, që i parashtroi VMRO-DPMNE, si dhe ndryshimet e Ligjit për parti politike, të parashtruara nga LSDM-ja, me të cilat ndalohet që shoqatat dhe fondacionet të mbajnë emra fashistë. Me ndryshimet e miratuara, të gjitha shoqatat dhe fondacionet e regjistruara deri më tani, si dhe parti politike, kanë afat prej tre muajve të harmonizohen me ndryshimet e miratuara ligjore.