Kryeministri i Kosovës, njëherit edh lideri i Lëvizjes Vetëvendosje, Albin Kurti, ka kujtuar aktivistin e partisë, Arbënor Deharin në 10 vjetorin e vdekjes ku tha se ishte shembull por jo vetëm, ishte edhe student i shkëlqyer.
Kurti tha se Arbënori kishte prirje intelektuale për të afruar te populli pikëpamjet filozofike e shkencore dhe shtoi se e kujton me mall dhe se nuk do ta harrojë kurrë.
“Këmbëngulja e modestia, puna e palodhur dhe durimi. Arbënor Dehari ka qenë ai shembull i aktivistit që nuk dua ta quaj të rrallë, sepse dëshiroj që të gjithë ne të kemi cilësi të ngjashme me të. Arbënori ka qenë prijës i aktivistëve të gjeneratës së tij. Student i shkëlqyer në shkollën politike të Lëvizjes, lexues e përkthyes, herë pas here edhe kontribues me tekste, për përparimin e debatit të argumentuar ideor dhe të mendimit kritik në shoqërinë tonë. Ai nuk kishte pretendime për të qenë prodhues opinionesh për konsum të përditshëm, por kishte prirjen intelektuale për të afruar te populli pikëpamjet filozofike e shkencore. E kujtojmë me mall, dhe gëzohemi sa herë shohim te njëri-tjetri ato vlera, atë gatishmëri, pa ambicie për vete e me shumë ambicie për kombin, shoqërinë dhe Republikën.
Kurrë nuk të harrojmë, Arbënor Dehari”, ka shkruar Kurti.