A janë duke pasur problem qeveritarët tanë për të marrë certifikata sigurie të NATO-s apo vonesa e të njëjtave po ndodh për shkak se procedura e marrjes së certifikatave duhet të zgjasin ca kohë?
Cila do që të jetë, këtë situatë më së miri po e shfrytëzon opozitarja VMRO-DPMNE, nënkryetari i së cilës edhe hapur bën deklarata me të cilat thotë se dëshiron të provokojë. Më konkretisht akuzon ministrin e Brendshëm Oliver Spasovski dhe atë të Drejtësisë Bojan Mariçiq për përfshirje në korrupsion dhe bashkëpunim me shërbime të vendeve jo-anëtare të NATO-s.
“Mendoj se bëhet fjalë për skandal absolut dhe minimumi që duhet të bëjnë është të japin dorëheqje. Ja një provokim publik, se nuk dua të jem monoton në deklarata. Një provokim publik deri tek të dy. A mos njëri nuk ka certifikatë sigurie për shkak të bashkëpunimit me shërbime që nuk janë pjesë e aleancës së NATO-s, ndërsa i dyti për shkak të korrupsionit”, theksoi Aleksandar Nikollovski – nënkryetar i VMRO-DPMNE-së.
TV21 pyeti si në kabinetin e Spasovskit po ashtu edhe atë të Mariçiqit se ku qëndron puna për vonesat. Përgjigja që morëm është qëndrimi që Qeveria ka lëshuar, ku thuhet se procedurat administrative për marrjen e certifikatës së sigurisë janë identike për të gjitha vendet anëtare të NATO-s, zgjasin deri në 6 muaj, ndërsa shtojnë se pandemia në mënyrë shtesë e ka prolonguar procesin.
“Për ministrin e Brendshëm, procedura është në vijim e sipër, ndërsa për ministrin e Drejtësisë, një dokument i këtillë aspak nuk është i nevojshëm. Pavarësisht kësaj, Presidenti i shtetit, kryetari i Qeverisë, Kryetari i Kuvendit, posedojnë certifikatë nacionale të sigurisë”, thonë nga Qeveria e Maqedonisë së Veriut.
Ekspertët e sigurisë presin që nga 500 deri në 600 qytetarë të Maqedonisë së Veriut të marrin certifikatë sigurie të NATO-s. Profesori Marjan Gjurovski tregon se ato janë të tipeve dhe niveleve të ndryshme.
“Është shumë e rëndësishme të dihet se në këtë kontroll për certifikata të NATO-s nuk ka vend për bisedime dhe nuk ka vend për politikë. A jeni djathtistë apo majtistë, realisht edhe partitë politike në Maqedoni nuk duhet ta nxjerrin këtë temë në mejdanin politik sepse absolutisht këtu nuk ka temë për diskutim, po përkundrazi, sjellja e partive politike në 29 vitet e fundit ndaj sistemi të sigurisë dhe mbrojtjes ka çuar në partizimin shtesë dhe kriminalizimin e një pjese të strukturave”, potencoi Marjan Gjurovski – profesor i sigurisë.
Deri më tani është mësuar se dhjetëra persona nga Maqedonia e Veriut janë refuzuar për të marrë certifikatë sigurie të NATO-s. Ajo që kontrollohet gjatë procesit të marrjes së këtij dokumenti është nëse aplikuesi ose të afërm të tij, kanë pasur kontakt ose ka bashkëpunuar me shërbime sekrete të vendeve që kanë qëndrim armiqësor ndaj NATO-s. Një segment tjetër që shqyrtohet është nëse kërkuesi i kësaj certifikate eventualisht është i përfshirë në korrupsion.