Pasi u publikua dokumenti përmes së cilit MPB kundërshton Propozim ligjin për shtetësi, reagoi ASH-AAA, koalicion i cili ishte propozues i këtij ligji. Zëdhënësi Flakron Bexheti e quajti skandal aktin e MPB-së.
“Skandal, skandal i barasvlerë me veprimet e sistemeve totalitare të njëherë e një kohe! Siç duket qeveria LSDM–BDI bashkë me vëllazërim-bashkimin e Jugosllavisë, të kamufluar nën sloganin “Shoqëri e përbashkët për të gjithë”, po na risjell edhe mendësinë moniste, me gjithë tiparet e saja”, tha Flakron Bexheti nga Aleanca për Shqiptarët.
Ndryshe më datë 28 dhjetor 2020 MPB ka dërguar mendim deri tek Qeveria e Maqedonisë së Veriut duke theksuar se në propozim ligj nuk janë definuar qartë disa aspekte:
“-Mënyra e marrjes së shtetësisë, përkatësisht pretendohet konstatimi i statusit shtetas ose përfitimi i shtetësisë si rezultat i natyralizimit brenda shtetit.
-Dallimi mes tyre është përmbajtjesorë: konstatimi nënkupton shtetësi nga momenti i lindjes, ndërsa natyralizimi nënkupton proces nga dorëzimi i vendimit për shtetësi.
-Nuk janë definuar qartë kategoritë e personave në normat e përfshira, pasi me përcaktimin “të ketë jetuar” nga 8 shtatori 1991 pa saktësimin e periudhës mund të interpretohen ditët, muajt dhe vitet;
-Nuk janë definuar kushtet për shtetësi dhe rëndësia e dëshmive për plotësimin e kushteve sipas ligjit”, thonë nga Ministria e Punëve të Brendshme.
Në fund të këtij mendimi është nënshkruar edhe i pari i Ministrisë së Punëve të Brendshme Oliver Spasovski.
Për këtë propozim-ligj, para disa dite ka folur edhe kryeparlamentari Talat Xhaferi. Ai tha se në propozim ligj ka elemente për të cilat duhet të diskutohet, por nuk tregoi saktë se për çfarë e ka fjalën. Sipas opozitës shqiptare janë mbi 60 mijë shqiptarë pa shtetësi për shkak të ligjit aktual i cili përmban shumë kushte dhe kërkesa absurde. ASH-AAA kërkojnë që ndryshimet të bëhen para regjistrimit të popullsisë me qëllim që këto persona të jenë pjesë e regjistrimit.