VMRO-DPMNE dhe Koalicioni VLEN kanë formuar grupet e punës për negociata dhe të njejtat shumë shpejtë do të nisin bisedimet për ndarje të kulaçit qeveritar.
Valbon Limani nga koalicioni VLEN, thotë se ende nuk ka një kornizë të kërkesave sa i përket ministrive, por më e rëndësishmja për ta është që të jenë produktiv aty ku do të menaxhojnë. Për ta nuk ka rëndësi numri i ministrive.
“Ende nuk ka informata konkrete cilat dikastere do t’i kërkojë VLEN. Besoj se kur të fillojë grupi punues, do ta kemi kornizën e kërkesave edhe të ministrive edhe të eshalonit të dytë në Qeveri. Edhe njëherë do ta përsëris, qëllimi ynë nuk është numri i ministrive por është realizimi i të gjitha punëve të cilat i kemi nëpër ministri.
-Me këtë që po e paralajmëroni se do të keni më pak ministri si përfaqësues shqiptarë në Qeveri kur thoni se numri nuk është me rëndësi?
-Nuk e di, mund të ndodhë të ketë një ose dy më pak mirëpo prap do ta përsëris se qëllimi i asaj është që të realizohen të gjitha synimet dhe programet që kanë të bëjnë me ato ministri.”, tregon Limani.
Por a është edhe posti i kryeparlamentarit në tavolinën e bisedimeve VMRO-VLEN?
“A është kryeparlamentari në tavolinë të bisedimeve? Kjo më intereson.
-Po është, është…
-A ka përballje me VMRO-në që nuk e lëshon këtë si pozicion?
-Jo nuk ka, besoj se do të arrihet marrëveshja”, tregon më tej Limani.
E nëse rastësisht ndodh një kthesë, nëse VLEN nuk arrin marrëveshje me VMRO-në, dhe kjo e fundit kthehet nga Fronti Europian? Valdet Xhaferi nga Fronti ripërsëriti se kushti kryesor për bisedime, do të jenë ndryshimet kushtetuese.
“Pjesë e kushtit kryesor për bisedime për Qeverinë janë në radhë të parë ndryshimet kushtetuese si dhe ruajtja e kursit të vendit drejt Bashkimit Europian.
-Dhe në një moment kur VMRO-DPMNE-ja nuk do të dojë të dëgjojë për këtë, dmth nuk mund të presim ndonjë kthim të papritur siç ju pyeta?
-Për situata të cilat mund të ndodhin nesër, do të flasim sigurisht përshkak se pyetja është hipotetike”, shprehet Xhaferi.
Se ndryshimet kushtetuese do të jenë pjesë e kushteve për bashkëqeverisje, e pohoi edhe Valbon Limani nga VLEN, i cili tha se nëse të njejtat nuk realizohen në afat prej gjashtë muajve, VLEN do ta rishqyrtojë pjesëmarrjen në Qeveri.