Kryeministri u kthye nga Berlini optimist! Mickoski: Opozita do të zhgënjehet

Kryeministri Hristijan Mickoski, pas vizitës në Berlin, u kthye si optimist për procesin e integrimit evropian, por nuk tregoi pse. Fjalimi i tij hapi më shumë dilema për mënyrat se si do të zhbllokohet procesi. Ai nuk deshi të zbulojë asnjë detaj, duke thënë se nuk donte të prishte pritshmëritë për atë se si do të zhvillohen gjërat në të ardhmen. Madje është në dilemë nëse do të dërgojë letër me propozime në Bruksel.

“Bisedat që u zhvilluan në Berlin më bëjnë shumë më optimist sesa isha më parë dhe kam frikë se… kam një dilemë personale, nuk kam marrë ende një vendim përfundimtar, se letra mund të na shpërqendrojë nga ajo që u diskutua në Berlin. Megjithatë, përmbajtja e letrës në përgjithësi u përcoll tek bashkëbiseduesit atje”, tha kryeministri Hristijan Mickoski.

Kryeministri e hodhi kategorikisht poshtë idenë e Bujar Osmanit për ndryshime kushtetuese, të cilat me një ligj të veçantë në të ardhmen do të ishin të pezulluara nëse Bullgaria do ta bllokonte sërish vendin. Sipas Mickoskit, ky propozim nuk është në përputhje me ligjin. Ai njoftoi se për propozimet nga ana jonë do të diskutohet edhe me kryetaren e Komisionit Evropian, Ursula von der Leyen, e cila javën e ardhshme do të mbërrijë në Shkup. Ndërkohë, kryeministri theksoi se do të punojë për mbrojtjen e interesave kombëtare, duke shtuar se interes kombëtar është edhe anëtarësimi i plotë në Bashkimin Evropian.

“Mesazhi im për qytetarët është se sjellja e kësaj Qeverie dhe e imja si kryeministër do të zhgënjejë një grup njerëzish, dhe ajo është opozita, por të jenë të sigurt se kurrë, ama kurrë dhe me asnjë çmim nuk do t’i tradhtoj pritshmëritë e qytetarëve”, u shpreh kryeministri Hristijan Mickoski.

Ndryshe, nga Berlini zyrtar më parë njoftuan se një hap i domosdoshëm për integrimin janë ndryshimet kushtetuese.

“Proceset më të rëndësishme të integrimit ndodhin kur ata që janë përgjegjës politikisht kanë guximin të veprojnë edhe kundër asaj që është opinioni publik”, shtoi ministrja e Jashtme e Gjermanisë, Annalena Baerbock.

Ministrja gjermane Berbok theksoi se rregullat nuk kanë ndryshuar dhe për marrjen e vendimeve në Bashkimin Evropian ende është e nevojshme njëzëshmëria e të gjitha vendeve anëtare.