Komuna Qendër rrënon terren tenisi në Vodno! Thonë se i gjithë kompleksi është ndërtuar pa leje

Ofensiva e komunës Qendër rrënoi edhe një objekt të ndërtuar pa leje. Për kompleksin që gjendet në rrugën Sllavejko Arsov në Vodno, u dha vendim për rrënim për shkak se që para disa viteve kompleksi është ndërtuar pa leje.

Siç thonë nga Komuna Qendër, bëhet fjalë për kompleks të klubit të tenisit, ku përveç terreneve të ndërtuara, pa leje ka edhe kafene dhe nyje sanitare.

Pronari në afatin e paraparë nuk ka vepruar vetë, andaj komuna ka marrë aksion për rrënim, ndërsa shpenzimet do t’i mbulojë investitori. Bëhet fjalë për objekt më të madh, andaj rrënimi do të zgjasë disa ditë. Kryetari i Komunës Qendër me apel:

 “Apeloj edhe një herë, investitorët dhe pronarët e objekteve ilegale të veprojnë për vendimet e dhëna, në të kundërtën Komuna Qendër do t’i rrënojë objektet ndërsa shpenzimet do t’i mbulojnë investitorët, përkatësisht pronarët e objekteve”, tha Sasha Bogdanoviq – Kryetar i Komunës Qendër.

Para pak kohe Komuna Qendër filloi aksion të madh inspektues ku do të rrënohen gjithsej 18 objekte të ndërtuara pa leje  në territorin e kësaj komune. Deri më tani me mekanizma ndërtimor u rrënuan disa objekte të ndërtuara në mënyrë ilegale në territorin e komunës. Bëhet fjalë për 5 objekte të përkohshme dhe 6 kioska. Janë rrënuar edhe dy garazhe në lagjen Debar Mahallë. Aksioni filloi javën e kaluar, me rrënimin e dy objekteve të ndërtuara në mënyrë ilegale në Vodnjanska.