Shtetet e Bashkuara nuk kanë asnjë provë apo sinjal në lidhje me një aktivitet të mundshëm ushtarak të Kinës kundër Tajvanit.
Kështu u shpreh zëdhënësi i Sigurisë Kombëtare të Shtëpisë së Bardhë, John Kirby kur u pyet për një vizitë të mundshme në ishull nga kryetarja e Dhomës së Përfaqësuesve të SHBA Nancy Pelosi, shkruan Reuters.
“Ne nuk kemi parë asnjë tregues fizik, të prekshëm për ndonjë gjë të pakëndshme në lidhje me Tajvanin,” u tha Kirby gazetarëve. Pelosi ende nuk ka konfirmuar nëse do udhëtojë në Tajvan.
Të enjten, presidenti amerikan, Joe Biden dhe ai kinez, Xi Jinping zhvilluan për 2 orë një bisedë telefonike, tema kryesore e së cilës ishte Tajvani.
Kina është zotuar se do të aneksojë Tajvanin edhe me forcë, nëse e nevojshme dhe ka dërguar aeroplanë luftarakë afër hapësirës ajrore tajvaneze.